Gilungkab sa wala mailhing kawatan ang opisina sa Community Extension Service Department sa University of San Carlos North Campus sa may dalan General Maxilum, ning dakbayan kagahapon sa kaadlawon.
Usa sa mga kawani sa maong opisina nga si Riza Bontilao miasoy nga iyang gidudahang diha miagi sa luyo ang mga gituohang kawatan tungod kay naguba na ang sliding window sa maong opisina.
Nakuha sa mga kawatan ang dul-an sa 200 ka karton nga gatas, 150 ka delatang pagkaon,200 ka putos nga chocolate drink ug usa ka electric water dispenser nga tanan gibanabanang mokabat ngadto sa 15 mil pesos.
Si Bontilao mipadayag nga bag-uhay pa nila gikumpra ang maong mga pagkaon kay ila kining ipanghatag karong Disyembre 18 sa 200 ka pamilya sa Barangay Lusaran, bukirang bahin ning dakbayan isip bundles of joy.
Usa ka working student sa nahisgutang opisina ang nakabantay sa pagkawala sa ilang kinumpra ug gireport dayon kini sa Fuente Police Station pinaagi ni Damacio delos Reyes, imbestigador sa Pioneer Security Agency, nga maoy nagbantay sa nahisgutang tunghaan.
Niining mga tungora, padayon pa ang imbestigasyon sa kapulisan aron sa pag-ila sa mga wala mailhing kawatan.