Nahingpit na ang hukom ni Banilad Barangay Kapitan Glenn Bercede nga sakbangan si incumbent Association Barangay Council Federation President Joveta Tuela Joy Ouano sa iyang pagpasubli sa katungdanan sa ABC election karong Disyembre 29 niining tuiga.
Gipadayag kini ni Kapitan Bercede dihang gikahinabi sa Banat News niadtong miaging adlaw.
Matud pa niya nga nadasig siya sa pag-apil sa miaging barangay eleksiyon tungod sa dako niyang tinguha nga maoy makalingkod isip ABC Federation president.
Dugang pa niya nga ang 24 ka mga kauban nilang kapitan ang mipadayag na og suporta sa iyang kandidatura ug dako ang iyang pagtuo nga mapun-an pa ang maong gidaghanon panahon sa piniliay.
Kahinumdoman si Kapitan Bercede maoy tandem ni Mayor Jonas Cortes sa Team Honesty sa miaging 2004 election apan napildi kini ni Bise Mayor Carlo Fortuna sa Power Team 4 nga maoy Tandem ni Jonkie Ouano.
Si Joy nga igsoon ni kanhi Mayor Thadeo Ouano kinsa anaa na sa iyang ikatulong termino isip barangay kapitan sa Opao ang naghupot sa maong katungdanan sulod sa duha na ka termino.
Naghupot usab si Joy og dakong katungdanan sa regional ug national level sa ABC sulod sa pipila na ka mga tuig.