Pamilya nahilo sa tikong; 1 patay, 15 angol

Usa ang patay ug laing 15 ka mga tawo ang nalandig sa tambalanan sa usa ka pamilyahan human nahilo sa gikaon nga linarang nga isdang tikong sa miaging hapon diha sa sitio Bantigue, barangay Agujo, lungsod sa Daanbantayan, Sugbu.

Ang namatay giila ni PO2 Mamerto Gastador nga mao si Eleuterio Rosacenia, usa ka mananagat samtang  naangol mao sila si Eleuterio Jr, anak sa namatay, Regie 9, Miriam, 13, Eldon, 8, Elmarie, 7, Gracela, 11, Genievie, 8, Francisca, 74, Glecerio, 43, Adriano, 76, Victor, 35, Cerafina, 42, Anastacio, Maria Luz ug ang silingan niining si James Ponce, 11, silang tanan pulos residente sa nahisgutang barangay.

Si Gastador mitug-an sa pakighinabi sa Banat News nga nakadawat sila og report  mga alas 4 ngadto sa alas 6 sa miaging gabii kabahin sa pagkahilo sa mga biktima.

Sa inisyal nga imbestigasyon nasayran ang namatay nga si Elueterio Sr. gikan nanagat ug nakakuha kini og klase sa isdang tikong gibana-banang  duha ngadto sa tulo ka tiil ang gitas-on niini. 

Pag-abot sa balay giluto sa anak niining si Eleuterio Jr. ang maong isda pinaagi sa larang apan gisagolan og gamay nga “maypay” nga  parte sa lawas sa maong isda nga makahilo, sumala pang PO2 Gastador.

Human sa ilang pagpangaon unang nalipong si Eleuterio Sr. ug nagsuka-suka dungan sa pagpanakit sa ilang mga tiyan ug ang uban usab susama og gibati ug nagsuka-suka.

Ang tanang mga biktima daling gipanghatod sa Daanbantayan District Hospital apan si Eleuterio Sr. ang gideklarar kini sa mga doktor nga miatiman kanila nga nakabsan nang daan sa kinabuhi sa wala pa kini madangat sa maong tambalanan.

Si Eleuterio Jr. daling gibalhin sa Verallo Memorial District Hospital sa siyudad sa Bogo apan base sa nahipos nga kasayuran sa kapolisan gi-refer usab sa mga doktor sa Vicente Sotto Memorial Medical Center alang sa dugang pag-atiman tungod kay gihulagway kini nga usa sa mga nagrabehan.

Hinuon gibutyag ni PO2 Gastador nga luwas na sa peligro  nga kahimtang ang 13 sa  15 pa nga nangahilo apan pabilin hinuong giatiman sa Daanbantayan District Hospital gawas lang nila ni Regie ug Miriam nga padayon pang gi-obserbahan sa mga doktor sa maong tambalanan.

Si Daanbantayan Bise  Mayor Maria Luisa Loot miingon nga gihimong sud-an sa panihapon sa pamilyang Rosacenia ang isdang tikong hinungdan sa ilang pagkalanag.

Hinuon mipasalig ang bise mayor nga ilang tabangan ang pamilyang Rosacenia pinaagi sa paghatag niini og financial assistance.

Nunot niini, giawhag ni   Loot ang mga molupyo sa ilang lungsod nga likayan ang pagkaon sa isdang tikong ingon man ang isdang botete gumikan kay makahilo kining maong matang sa isda.

Midugang si Loot nga kadaghan na nahitabo nga dunay pamilya sa ilang lungsod ang nangahilo gumikan sa pagkaon niining maong matang sa isda.