Gipanghimakak sa Simbahang Katoliko ang pasangil nga may labot kini sa pagduyog sa pipila sa ilang obispo sa pakyas nga kudeta ni Senador Antonio Trillanes ug mga kaubanan niadtong Nobiyembre 29 sa Manila Peninsula Hotel sa Makati.
Matud pa ni Msgr. Achilles Dakay, tigpamaba sa Archdiocese sa Cebu nga dili opisyal nga sugo sa simbahan ang gihimo nila ni Obispo Julio Labayen, Antonio Tobias ug uban pa pagkuyog sa grupo ni Trillanes bisan hangtod ngadto sa Manila Pen.
Si Labayen ug Tobias ug uban pang mga obispo nga nalambigit sa lakang ni Trillanes ug mga kaubanan sa pag-alsa batok sa gobyerno pinaagi sa pagpapahawa kang Presidente Gloria Macapagal Arroyo, pulos mga miyembro sa Catholic Bishop Conference of the Philippines (CBCP).
Matud pa ni Dakay nga gipahungaw lamang sa maong mga opisyal sa simbahan ang ilang sentimento gumikan sa personal usab nilang nasinatian karon.
Apan sama kanila ni Trillanes, bisan siya nga kanhi usa ka sundalo ug karon usa na ka senador, wala magpasabot nga gidala niya ang tingog sa senado o kaha militar sa iyang kawsa.
Ingon usab niini ang nahimo nila ni Labayen ug Tobias ug mga kaubanan nga mihimo og lakang sa kaugalingon nilang pagtuo ug walay tawo nga nagsugo ug nagpugos kanila pagduyog sa usa ka kawsa.
Gihimo sa tigpamaba sa simbahan ang maong panghimakak nunot sa daghang mga pagduda nga may pagtugot sa simbahan ang gihimo sa maong mga obispo.