Laing kaso vs Aves mitumaw

Gawas sa 17 ka mga kaso nga una nang giatubang sa gunman sa Alpha Kappa Rho nga  si Aristotle “Ares” Aves ug kauban niining si Jesus Singson Jr. laing kaso ang gipasaka sa piskaliya batok kang Aves kagahapong adlawa.

Usa ka Angelito Reyes Sr. hingkod ang panuigon  pormal nga misang-at og kasong frustrated murder batok kang Aves ug sa kauban niining si Singson sa piskaliya.

Subay sa reklamo nga giduso ni Reyes gitumbok niini si Aves ug Singson nga maoy mipusil kaniya ug sa iyang mga kauban samtang sila nag-inom sa may dalan D. Jakosalem corner Sanciangko niadtong petsa 21 sa Septiyembre dihang kalit lang miabot ang mga suspek nga nag-motorsiklo ug deretso silang gipamusil.

Gibutyag ni Reyes nga nailhan nila si Aves ug Singson nga maoy responsable sa pagpamusil kaniya ug sa iyang mga kauban niadtong higayona human nila kini makita sa Cebu City Police Office (CCPO) dihang nasikop sa kapolisan nga molarga unta paingon sa Ormoc niadtong milabay’ng mga adlaw.

Nasayran nga namatay ang duha ka kauban  nga kainom ni Reyes niadtong hitaboa nga naila sa pangalan nga sila si Eugenio Presbetero ug usa ka Benjamen Dilao.

Nasayran nga si Aves mao usay gitumbok nga responsable sa drive-by-shooting nga nahitabo dinhi sa dakbayan niadtong Oktubre 4.