Patay ang usa ka 53 anyos nga lalaki nga mangolingay human naligas ang tiil niini sa giagian nga pangpang ug naligid-ligid hangtod nga nalahos sa lim-aw ug nalumos.
Nahitabo kini sa miaging adlaw diha sa bukirang bahin sa barangay Manduwang, gibana-banang singko kilometro ang gilay-on gikan sa Poblacion, Minglanilla, Cebu.
Nakaangkon og dakong samad sa agtang ang biktimang si Jovencio Lascoña, minyo, mag-uuma ug residente sa nahisgutang lugar.
Si PO2 Rolando Camillo mitug-an sa mga tigbalita nga gikan sa umahan ang biktima ug paingon na kining mopauli sa ilang balay subay sa pangpang.
Matud sa taho nga kalit lang naligas ang tiil niini ug naligid sa pangpang hinungdan nga nawad-an kini sa panimuot ug pag-abot sa ubos nga bahin didto mitugpa sa lim-aw sa sapa nga maoy nakaingon sa hinanaling kamatayon.
Gituohang nabunal ang ulo sa dakong bato tungod sa nakitang samad sa agtang sa biktima.
Tupad sa nagbuy-od nga patay’ng lawas sa biktima mao ang usa ka sakong uling nga gituohang gipas-an sa biktima.
Matud ni PO2 Camillo nga walay foul play ang kamatayon sa biktima kay mismo ang anak niining lalaki mituyo og bisita sa ilang buhatan ug mituo nga nabunal ang ulo sa ilang amahan sa dakong bato samtang kini naligas ang tiil niini ug nakuyapan.
Nidungag usab si PO2 Camillo nga mitug-an kanila ang anak nga walay kontra ug walay gikalalis sa ilang dapit ang ilang amahan ug nagtuong disgrasya gyud ang maong hitabo.