Mga polis sa Task Force Aves i-promote – Roderos
Naglaraw si Police Regional Office-7 director, Chief Supt. Ronald Roderos nga mahatagan og spot promotions ang mga sakop sa Task Force Aves nga maoy nakasikop sa gipasanginlang notadong hitman sa Alpha Kappa
Si Roderos mitug-an atol sa Talakayan Sa Isyung Polis (TSIP) nga inabagan sa Public Information Agency kagahapon nga iyang irekomendar ang grupo ngadto sa kaulohan nga makakuha og spot promotions.
Ang maong grupo gipanguluhan ni Supt. Pablo Labra ug ni Sr. Insp. George Ylanan isip task force commander. Ang maong grupo naggikan sa special units nga mitutok sa paggukod kang Aves sukad pa niadtong tuig 2004.
Si Aves dunay 17 ka mga kasong giatubang sa Homicide Section sukad pa niadtong 2004 hangtud ning mga tungura. Niadtong Lunes sa gabii nasikop si Aves diha sa Pier 8 sa dakbayan sa Mandaue samtang nagpaabot nga mobiya ang ferry boat padulong sa Ormoc City.
Gawas sa spot promotions makadawat usab karong adlaw’ng Lunes og mga medalya ang maong mga polis ug commendation letters agig pahalipay sa ilang nahimo.
Samtang nagpasalamat og dako si Roderos sa kagamhanan sa dakbayan sa Sugbu tungod sa gihatag nga suporta pinaagi sa reward nga P300,000.
Sumala pang Roderos, ang PNP higpit mopahamtang og silot sa badlungong mga polis apan galante usab mohatag og pasidungog niadtong mga magtinarong sa trabaho.
- Latest
- Trending
