P35mil nakuhag coins sa mga video karera

Mikabat sa usa ka sako worth P35,000  ug tungang mga piso nga sensiyo ug P700 nga papel nga kwarta ang nahabwa gikan sa 30 ka video karera machines ug duha ka mole-mole nga nasakmit sa kapolisan sa dakbayan sa Talisay.

Ang maong mga makinang pasugalan ang giguba ug gisunog kagahapon sa buntag diha sa likod sa city hall sa mga opisyal sa dakbayan.

Ang nahisgutang salapi ang gitugyan sa kapolisan ngadto sa treasurer aron maresibohan kini ug dayon gitugyan usab diha sa City Social Welfare.

Si Police Superintendent Romeo Perigo, hepe sa kapolisan sa dakbayan mibutyag nga ang maong mga makina nasakmit nila gikan sa nagkalain-laing barangay sa siyudad diin ang 12 niini nasakmit niadtong Abril 1, 2006 sa paglingkod niya sa pwesto ug ang uban sa buwan na sa Oktubre niining tuiga sa pagpahigayon nila og higpit nga operasyon batok sa ilegal nga sugal.

Apan ang hepe dili sigurado kung kompleto pa ba sa Central Processing Unit (CPU) ug mother board ang maong mga makinang pasugal.

Gikataho nga ang CPU ug mother board maoy pinakamahal ug importanteng pisa sa makina ug dalion kini og kuha sa mga caretaker sa mga video karera kung makabantay nga dunay mga polis nga moronda.

Gawas sa mga opisyal sa Talisay ang mga kapitan sa mga barangay Pook, Osmundo Manreal Jr., Charles Basillote sa Dumlog, Josefina Conceal sa Candulawan, Marlou Dagohoy sa Biasong ug Romulo Reville sa Lawaan II ang mitambong sa ceremonial burning sa mga makina.

Ang maong kalihokan gisugdan mga alas 11:00 sa buntag kagahapon kinsa si Konsehal Arturo Bas, Edward Alesna, Shirley Belleza, Ben Abatayo, Bernard Odilao, Rodolfo Cabigas ug Arron Capala ang miduslit sa mga makina.