Iranian nang-rape gipasakaan

Ang amahan lang sa   Iranian national ang napasakaan og kasong  rape human ang usa ka katabang   mireklamo sa amahan ug anak  nga milugos kaniya niadtong Hulyo16,17,18 niadtong  tuig 2006  sulod sa kuwarto sa usa ka condominium sa dalan Gorordo ning dakbayan.

Una niini ang  22  anyos nga biktima nga lumad nga taga lungsod sa Alcantara, Cebu usa ka house helper sa  usa ka manpower agency ug gikuhang katabang sa   Iranian national niadtong Hulyo 15, 2006.

Si Yosores, sa pinumpaang pamahayag, mitug-an nga niadtong Hulyo16 sa alas 6  sa kagabhion samtang nanghugas  og plato kalit lang gibira ni Nemotollah Norouzi ug gigamitan og kusog ug giingnan nga dili pasabaon gumikan kay    “pia-it must die.”

Sa kahadlok sa biktima wala na kini makahimo sa pagsukol ug bisan sa iyang pagdumili apan nalupig siya sa kusog hinungdan nga napahigda kini sa kama ug nakuha gyud ang iyang pagka babaye nga nagsud-ong usab ang anak niini nga si Mohammad.

Human sa maong paglugos, misulod  sa banyo si Nematollah, ug sa dihang magsul-ob na unta siya sa iyang sapot ang anak niini nga si Mohammad mibabag kaniya ug mipasok sa tudlo niini sa iyang kinatawo ug wala na gayud siya makahimo sa pagsukol gumikan kay wala na siyay umoy niadtong higayona.

Nasundan usab kini sa pagka-petsa 17 ug 18 sa Hulyo 2006 una pa siya na-rescue sa iyang kauban sa trabaho diha sa gi-istaran nga  condominium sa  dalan Gorordo.

Ang nakapaikag sa mga mata sa media  mao nga sa pagpasaka niini kagahapong adlawa sa Cebu City Prosecutor’s Office sa maong resolusyon nga gi-petsahan niadtong Mayo 22, 2007 ug gipirmahan mismo ni Cebu City Prosecutor Nicolas Sellon, ang amahan lang nga si Nematollah maoy gikasuhan sa usa ka count nga rape base sa Article 266-A sa Revised Penal Code ubos sa R.A. 8353 nga Anti-Rape Law of 1997, samtang ang anak niining si Mohammad wala giapil  sa pagpasaka og kaso.

Hinuon nakita sa piskaliya   nga adunay probable cause ang pagpasaka’g kasong rape  batok ni Nematollah kinsa at-large na karong mga higayona.

Kini gumikan sa mga  ebidensya sa medical certificate sa biktima nga nahilabtan gyud siya base usab sa mga laceration sa kinatawo niini.