Bullecer patabang sa NBI ug CIDG

Ang pangulo sa Aids Free Philippines Dr.  Rene Joseph Bullecer, mipahibalo nga mangayo na siya og panabang sa mga kadagkuan sa National Bureau of Investigation (NBI-7) ingon man sa mga opisyal sa Criminal Investigation and Detection Group (CIDG-7) labot sa lakang nga puhagon ang problema sa toro-toro diha sa dakbayan sa Mandaue.

Kini maoy gipahibalo ni  Bullecer  subay ning iyang pagkasagmuyo sa mga opisyal sa nahingtungdang dakbayan nga walay gihimo nga mahunong kining maong matang sa pasundayag nga malaw-ay ibabaw sa entablado.

Matud pa niini nga degrading kaayo ang problema diha sa dakbayan sa Mandaue labot niining “toro-toro” kini tungod kay dili lang ang mga tawo nga nanimuyo sa maong dakbayan maoy maapektuhan kun dili ang tibuok Sugbu maoy maulawan.

Kun mag-promote man gani ta dinhi sa Sugbu nga usa ka tourism haven sa nasud gikinahanglan unta nga adunay mga lagda sa kaluwasan sa katawhan sa ilang panglawas.

Kini tungod kay bating paminawon kun ang usa ka dayo o langyaw mopadayag nga nakuha niya ang usa ka sakit nga aids/HIV virus ug  “tulo” gikan dinhi sa Sugbu.

Gikunpirmar  usab niini nga gawas sa Mandaue aduna usay reports sa toro-toro sa dakbayan sa Lapulapu apan dili sama sa Mandaue nga naila na kaayo sa ubang mga lugar.

Sa nasayran nga ang kapulisan sa dakbayan sa Mandaue pinangulohan ni  Supt. Rodel Calungsud mipadayag na niini nga mohimo sila sa ilang kutob nga mahimo nga ma-undang kining maong problema sa “toro-toro” human nang-reklamo na ang mga lumolupyo sa maong dakbayan