Si Kongresista Eduardo Gullas mipahimangno sa mga bag-ong napiling lider sa Sangguniang Kabataan nga ang nasud nagkinahanglan nga magkahiusa ug dili angayang mobuhat og mga ilegal ug kriminal nga “adventurism” isip sukwahi sa gibuhat ni Sen Antonio Trillanes IV ug sa iyang mga kauban didto sa The Peninsula Hotel sa Makati City.
Si Gullas sa milabay’ng adlaw mipapanumpa sa mga chairman sa SK sa dakbayan sa Talisay.
Matud ni Gullas ngadto sa mga batan-ong lider nga ang nasud naukay niadtong Huwebes dihang si Trillanes ug si kanhi Scout Ranger commander Brigadier General Danilo Lim mibiya sa hearing kabahin sa ilang kasong coup d’etat sa Makati Regional Trial Court ug mipahigayon og protest march diha sa kadalanan sa dakbayan sa Makati.
Ang maong grupo mi-okupar sa nahisgutang hotel sulod sa unom ka oras ug nanawagan sa pagkanaog ni Presidente Gloria Macapagal Arroyo.
Alang sa kongresista nga ang nahitabo sa Makati usa ka isolated nga kaso ug ang kasagaran sa mga Pilipino mahadlokon sa kahitas-an ug mahigugmaon sa kalinaw.
Giawhag ni Gullas ang nahisgutang mga batan-ong lider nga dili i-give up ang nasud ug magsugod na sa pagserbisyo ngadto sa mga wala mobotar kanila sa milabay’ng eleksiyon sa SK.
Niadtong Huwebes ang kongresista usab ang mipapanumpa sa mga napiling tsirman sa SK sa dakbayan sa Carcar ug sa mga bag-ong napiling konsehal sa mga barangay.
Ang maong kalihukan gipahigayon diha sa University of the Visayas Main Campus.