Kapitan “misugo” pagpusil

Napusilan ang usa ka lalaki human miulbo ang kagubot nga gikalambigitan sa duha ka grupo, usa niini nga grupo  sa usa ka barangay kapitan sa miaging gabii diha sa Centro barangay Sagay siyudad sa Toledo.

Hinuon sa gipadangat nga report sa Cebu Provincial Police Office atol sa hot pursuit operation ang gitumbok nga namusil nasikop lakip na ang kapitan human gikatahong maoy nanugo nga pusilon ang biktima.

Ang napusilan kinsa anaa sa talandugon ang kahimtang human makaangkon og samad sa walang bahin sa liog giilang  si Ruel Rosalita, 29, ug residente sa nahisgutang barangay.

Samtang ang gitumbok nga nipusil sa biktima giilang   si Junel Aurita, 20,  anak sa konsehal sa nahisgutang barangay ug ang gipasanginlang maoy misugo nga pusilon ang biktima mao si  barangay kapitan Ronie Mendez.

Sa pasiunang imbestigasyon sa kapolisan sa Toledo gipangulohan ni SPO2 Larry Pili ug mga kaubanan ug base sa pamahayag mismo sa biktima ug ubang mga nakasaksi sa hitabo nga kalit lang miulbo ang kagubot tali sa grupo ni kapitan Mendez ug sa grupo sa ginganlan og Roy Lagomon.

Tungod niini ang suspetsado   mipusil ngadto sa biktima inabagan ni kapitan Mendez gamit ang wala matinong kalibre sa armas ug naigo sa liog.

Daling gihatud ang biktima sa usa sa mga tambalanan sa dakbayan sa Sugbu diin gikatahong anaa sa talandugon nga kahimtang human niungot ang bala sa likod sa iyang lawas samtang ang mga gikatahapan nasikop sa kapolisan ug gibalhog sa detention cell sa Toledo.