Binghay nanawagang pabuhian si Labayen

Si Monsenyor Esteban Binghay, mipaluyo sa kahugpungan sa mga sakop sa Catholic Bishop Conference of the Philippines (CBCP) sa panawagan niini sa gobiyerno nga pabuhian ang 81 anyos nga si retired Bishop Julio Labayen alang sa humanitarian reason human kini mosalmot sa gipahigayong stand-off sa grupo ni Senador Antonio Trillanes IV  sa Manila Peninsula Hotel.

Si  Binghay mipadayag nga sama sa gipadangat sa mga kadagkuan sa CBCP pabor siya nga hatagan og consideration si  Labayen gumikan sa pangidaron na niini.

Si   Binghay mipasabot nga katungod sa mga ka-obispohan ang pagpadayag sa ilang hangyo ngadto sa gobiyerno ug pagtabang sa ilang mga kaubanan nga buhian ang ilang kaubang bishop bisan paman kun retirado na kini ug dili na aktibo sa kalihukan sa Simbahan.

Matud pa niini nga ang maong lakang gisentro lang usab sa simpatiya sa mga  Obispo ngadto sa ilang kauban niadto nga wala na sa serbisyo nga anaa gihapon ang ilang tabang nga mapadangat sa goberno bisan tood kun kini nanawagan sa pagpa-retiro sa presidenti.

Hinuon dili na siya buot nga manginlabot pa sa unsay buhaton sa gobiyerno human unya mahatagan og humanitarian consideration nga mabuhian ug mohimo’g laing lakang batok sa gobiyerno.

Matud pa niini nga ang korte na maoy maghukom niini kun unsay matang sa kaso nga ilang ipasaka kini kun makahimo’g laing salaud ang maong bishop.

Sa nasayran nga si Bishop Angel Lagdameo, ang presidente sa CBCP miawhag sa gobiyerno nga pabuhian nalang si  Labayen, alang  sa humanitarian consideration gumikan sa taas na niining pangidaron.