Gidili ang pagselebrar sa Misa de Gallo sulod sa mga shopping malls ug hotels.
Ang Archbishop of Cebu mipagawas og direktiba kabahin sa pagselebrar sa naandan na nga siyam ka adlaw nga Misa de Gallo isip pagpangandam sa adlaw sa Pasko.
Ang Circular Letter nga naglatid sa direktiba, napatik karon sa senimanang issue sa Bag-ong Lungsoranon.
Matud sa Circular Letter, mipagawas si Monsignor Cristobal Garcia, ang nangulo sa Commission on Worship, ubos sa kamandoan sa Arsobispo sa Sugbu Ricardo Cardinal Vidal, sa maong direktiba aron malikayan ang posibleng mga kalapasan sa pagselebrar niini.
Ubos sa mga ginadili mao ang pagselebrar sa maong mga misa sulod sa mga shopping malls, hotels, mga opisina, pribado nga chapels ug clubhouses.
Nasayran nga adunay mga shopping mall, department store ug mga hotels nga mag Misa de Gallo usab sa ilang mga buhatan isip “additional convenience” alang sa ilang mga kliyente ug mga customer.
Apan matod sa direktiba gidili kini tungod kay wala kini nalatid sa “indult” nga nagtugot sa pagselebrar sa Misa de Gallo nga angayan nga sa simbahan lamang kini ihalad.
Ang “indult” mao ang espesyal nga pagtugot sa Katolikong Simbahan sa gimbuhaton nga ginadili.
Ang Misa de Gallo, nagsugod isip usa ka espesyal nga pagtugot niadtong 1587 aron mahatagan og higayon nga makasimba ang mga bag-o lang nga naagni sa Simbahan.
Ubang mga lugar nga gidili ang pagselebrar sa Misa de Gallo mao ang mga villages, housing projects, mga pabrika, eskwelahan, tindahan, eskina sa dalan, basketball courts, dancehalls, parke, restaurants ug ubang mga lugar nga dili angay nga misahan.
Ginadili usab ang paghalad og anticipated Misa de Gallo o Simbang Gabi ug ang pagmisa gawas lamang sa gitugot nga matag alas kwatro ngadto sa alas singko sa kaadlawon.