Polis imbitahon bahin sa ambush sa Tres de Abril, niadtong Huwebes

Ipatawag karong Lunes sa Homicide Section ang usa ka polis nga nadestino sa National Police Commission-7 aron paghatag og katin-awan kabahin sa nahitabong pag-ambush sa usa ka gradwado sa kursong nursing kinsa namatay diha sa tambalanan niadtong milabay’ng Huwebes sa hapon.

Ang maong polis giilang si PO2 Armando Parot kinsa maoy mikiha sa biktimang si John Sherwin Sun, 24, taga dalan Garfield sa barangay Pahina- San Nicolas tungod sa pasangil nga duna kini relasyon sa asawa sa maong polis.

Sumala pang Sr. Supt. Patrocinio Comendador   dunay nakitang basehanan sa pagpatawag kang Parot kabahin sa insidente aron sa ingon dili kini makabalibad sa imbitasyon.

Si Inspector Mario Monilar, hepe sa Homicide Section sa pakighinabi sa Banat News kagahapon mitug-an nga gikan pa sa barangay hall sa Labangon ang biktima niadtong tungura ug padulong na pauli uban sa iyang inahan ug igsuon dihang gibanhigan.

Duha ka wala mailhing lalaking sakay og pula nga XRM motorsiklo, usa kanila nga giingong backrider ug nagsuot og jacket maoy mibanhig kanila samtang luwan sa Toyota Corolla GJB-205 pag-abot diha sa dalan Tres de Abril sa nahisgutang barangay.

Ang biktima diha sa luyo magsakay samtang ang inahan niini nga si Virginia diha sa atubangan samtang ang nagmaneho mao ang iyang igsuong si Ver Stephen dihang kalit nga mipaduol sa ilang luyo ang maong motorsiklo ug gipaulanan sila og bala.

Bugtong si Sun ra maoy naigo diha sa likod ug daling mipasutoy ang motorsiklo palayo sa lugar samtang daling gihatud ang biktima ngadto sa Chung Hua Hospital diin kini nakabsan sa kinabuhi human sa pipila ka minutos.

Tulo ka kabhang sa kalibre 45 nga bala ang napalgan diha sa crime scene ug gihimoan na og eksaminasyon sa PNP Crime Laboratory-7.

Sumala pa, si Sun gireklamo ni Parot ngadto sa Fuente Osmeña Police station niadtong Oktubre 23 sa buntag tungod kay giingong nasakpan sa maong polis ang  biktima ug   asawa niini nga dunay gihimong dili maayo diha sa usa ka review center nianang pagkagabii sa Oktubre 22 dihang si Parot ug iyang anak nga tulo   pa ka  tuig miapas sa iyang asawa apan siya maoy gidabu-dabuhan ni Sun.

Apan nianang pagkagabii sa samang adlaw (Oktubre 23) mipa-blotter usab si Sun ug mipasangil sa usa ka giila lang niining “Parot” ang mikalit og kulata kaniya samtang diha siya sulod sa review center nianang Oktubre 22 sa gabii.

Dunay gikatahong gisang-at nga kaso batok kang Parot diha sa buhatan sa Regional Internal Service-7 tungod sa pasangil nga pagpangulata, apan wala pa matino kung ang asawa ba niini o ba kaha si Sun.

Niadtong Huwebes, si Sun miadto sa barangay hall sa Punta Prinsesa aron motambong sa husay sa reklamo ni Parot kabahin sa pakigrelasyon niini sa asawa sa maong polis apan sa ilang pag-uli gibanhigan sila diha sa dalan.

“Maong ato siyang ipatawag tungod kay may mga pagduda ang pamilya sa namatay niya (Parot) kay wala may laing kontra ug kay mao man daw ang complainant sa ilang anak,” asoy pang Monilar.

Wala pa hinuon maklaro kung giisip nang suspek si Parot gawas lang nga pangayoan kini og pamahayag kabahin sa maong insidente.