Landslide sa Malabuyoc

Upat ka balay ug mokabat sa 1.7 milyones ang kinatibuk-ang danyos dihang mihagsa ang kilid sa usa ka bukid niadtong Miyerkules sa gabii diha sa sitio Walog Lower sa barangay Cerdeña gibana-banang 14 ka kilometro ang gilay-on gikan sa Poblacion lungsod sa Malabuyoc.

Si Malabuyoc Councilor Hemostenes Ponce kinsa maoy chairman sa Disaster and Coordinating Council sa lungsod uban sa officer in charge (OIC) nga si SPO3 Feliciano Fuentes misusi sa dapit aron mohimog occular inspections sa landslide.

Sa inisyal nga imbestigasyon mokabat sa lima ka hektaryang umahan nga dunay mga pananom agrikultura ingon man hayopan ang natabunan sa yuta  gumikan sa pagdahili niini gikan sa ibabaw’ng bahin nga gibana-banang 800 ka metros ang gihabugon gikan sa maong pangpang.

Upat ka balay ang nahugmakan sa maong yuta apan wala pay na-report nga dunay tawong nasakitan o ba kaha missing sumala pa ni PO1 Dionesio Anticristo sa Malabuyoc police station sa pakighinabi sa Banat News.

Matud pang Anticristo, sugod sa pagpunay og bunok sa ulan dihang giagian sa bagyong Lando ang Sugbu gimando na sa opisyales sa barangay ug sa munisipyo nga mopalayo una sa ilang mga dapit ang mga residenteng duol sa maong pangpang.

Kini human dunay mga nisumbong nga namatikdang liki sa yuta diha sa maong pangpang ug gikabalak-ang sa bisan unsang oras posibleng mohugno kini, sumala pang Anticristo.

Gihulagway niya nga kanhi patag ang maong dapit apan dunay bahin niini sa ibabaw nga nidahili subay sa nakit-ang liki sa yuta.

Matud pang PO1 Anticristo ang pagpunay og bundak sa uwan sulod sa pipila ka adlaw mugna sa bagyong Lando ug Mina didto sa ilang lugar maoy usa sa hinungdan nga nidahili ang maong yuta.

Dugang pa niya nga dunay usa ka panimalay diha sa maong lugar nga wala magusbat pagdahili sa yuta apan nabalhin og pwesto pipila ka metros gikan sa ibabaw.

Matud ni PO1 Anticristo base sa iyang nahipos nga kasayuran nga kaniadto dunay gihimong drilling sa gas sa mga sakop sa Philippine National Oil Company (PNOC) ug maoy gidudahan nilang hinungdan sa nakit-ang mga liki sa maong pangpang.

 “Murag ikaduha o ikatulo na ba ni nga nidahili ang yuta sa maong lugar kaganiha sa among pag-adto sa among paminaw morag nagdahunog ang yuta ug nagkaanam og pagpangliki, ” dugang pa ni PO1 Anticristo kinsa kagahapong adlawa gikan pa sa maong dapit.

Gitug-an usab niya nga dunay mga residente nga nangguba sa ilang mga balay aron mobalhin ug motukod nalang og lain sa lugar nga layo sa peligro ang ilang kinabuhi.

Ang barangay Cerdeña maoy katapusang lugar nga sakop sa Malabuyoc ug utlanan usab sa lungsod sa Boljoon.