Pagsikop sa media sa PNP gisaway

Gikundinar sa Kapisanan ng mga Broadkaster ng Pilipinas (KBP-Cebu) ang pagsikop sa kapulisan ug pag-posas sa mga sakop sa media nga ni-cover sa nahitabong stand-off  sa Manila Peninsula niadtong miaging adlaw.

Ang chairman sa KBP Edward Abad nihulagway sa mga polis nga walay ensaktong kabangkaagan tungod sa pagposas nila sa mga sakop sa media ug gidala sa Camp Bagong Diwa ug gipaubos sa subsob nga interogasyon uban nila ni Senador Antonio Trillanes, kanhi Bise Presidente Teofisto Guingona ug Brig.Gen. Danilo Lim ug mga kaubanan.

Gumikan niini gitakdang mopagawas og joint resolution ang KBP-Cebu Chapter aron kundinahon ang gihimo sa kapulisan ngadto sa mga sakop sa media.

Alang niya walay nahimong kalapasan ang mga sakop sa media  tungod kay naghimo lang sila sa ilang trabaho sulod sa Manila Peninsula nga giokopar niadtong higayuna sa mga sakop sa Magdalo.

Gipasabot ni Abad nga ang mga sakop sa media nagsilbi kining mata sa katawhan aron mahatud ang mga panghitabo ug kasayuran diha sa maong stand -off.

Gihangop hinoon ni Abad ang lakang ni Presidential Management Staff Cerge Remonde nga angayang magkaestorya ang kapulisan ug mga sakop sa media aron maklaro ang limitasyon sa naulahi aron malikayan nga dili na masubli ang maong panghitabu.

Samtang nagtuo ang pipila ka mga magbabalaod dinhi sa Sugbu nga magsilbing leksyon sa uban pang sakop sa militar ang insidente.

Matod ni Kongresista Benhur Salimbangon sa 4th district makapahigmata sa uban pang sakop sa militar nga dili sulbad ug makadaot hinuon sa kalambuan sa nasud ang mga military adventurism.

Gitambagan sa kongresista ang ubang sakop sa militar nga kun dunay personal nga kayugot sa gobiyerno o ba kaha sa kasamtangang pamunoan dili lang anginon ang tibuok nasud.

Alang kaniya  dili sulbad sa nag-iyaid nga ekonomiya sa nasud ang mga pagrebelde ug pagpuhag sa gobiyerno.

Mapasalamaton hinoon ang kongresista nga hapsay, malinawon ug walay duguong nahitabo dihang gipatuman sa mga sakop sa Special Action Force sa PNP ug militar ang pag-aresto og balik sa mga sakop sa Magdalo.