DTI nagbantay batok sa gimik sa mga tindahan

Mipahigayon na karon og kalihokan ang kagamhanan aron bantayan ang mga gimik sama sa mga “promotional sale” ug “bargain sale” sa mga piniling mga produkto sa nagkalain-laing tindahan ning panahon sa Pasko.

Si Zaide Bation ang Trade and Regulatory officer sa Department of Trade and Industry (DTI-7) nagkanayon nga ang ilang mga field inspectors nagpunay na’g paniid sa mga tindahan kun mituman ba kini sa gisumiter nila ngadto sa DTI nga mga “mechanics” o mga pamaagi bahin ning ilang promosyon ug bargain sale sa ilang mga produkto.

Miingon si Bation nga kining ilang gihimo maoy pagprotiher sa katungod sa mga konsumedor gikan sa mga binilyakong paagi sa mga mapahimuslanong mga negosyante.

Gani bisan ang mga consumers desk diha sa mga dagkong tindahan gipaandam gyud sa DTI sa pagsuporta dayon niadtong mga kustomer nga moreklamo kay wa matagbaw sa serbisyo sa tindahan diin sila namalit alang sa Pasko.

Lakip usab nga gibantayan sa DTI mao ang mga substandard nga mga baligya sama sa mga appliances ug mga Christmas decors nga mag-dasok karon sa mga tindahan.

Nasayran gikan kang Bation nga kadaghan na sila makadawat og reklamo bahin sa giingong may mga tindahan nga dili motuman sa mga kondisyon nga ilang gitanyag diha sa mga gi-promote nilang mga produkto.

Miingon si Bation nga kutob sa masakpang malapason, diha-diha pahamtangan dayon og silot pinaagi sa pagkanselar sa ilang mga business permit.