Polis nga “hulidap” pasilutan

Pahamtangan og labing bug-at nga silot ni Police Regional Office –7 director, Chief Supt. Ronald Roderos sa kasong administratiba ang polis nga gipasanginlang nalambigit sa pag-“hulidap” ug pag-salvage sa usa ka gidudahang drug pusher nga gilabay diha sa barangay Busay.

Si Roderos sa pakighinabi sa mga tigbalita kagahapon mitug-an nga tungod sa ubay-ubay nang mga kasong kriminal ug administratibang giatubang karon kang PO2 Jaime dela Cruz hayan iyang tugutan ang labing bug-at nga silot kung kini mapamatud-ang sad-an sa kasong administratiba.

Sumala pang Roderos ang maong kaso adto hikayon sa Regional Investigation and Detective Management Division sa pagdumala ni Sr. Supt. Arturo Evangelista.

“We will enforce the maximum penalty on him (dela Cruz) administratively kasi based on his record he has many criminal and administrative case, I will personally follow his case,” asoy pang Roderos.

Si dela Cruz kasamtangan karong gitanggong diha sa stockade sa Cebu City Police Office ug gipaabot nga motubag sa alegasyon batok kaniya sa kasong kidnapping ug pagpatay kang Sergio Pagobo,Jr.22.

Si Pagobo taga sitio Matab-ang sa barangay Day-as lungsod sa Cordova gikatahong gisignit og mga tawong nagpailang polis tungod kay naaktuhan kining nibaligya og shabu niadtong Nobiyembre 10 sa hapon.

Apan pagkabuntag sunod adlaw patay nang napalgan si Pagobo diha sa sitio Garahe sa Upper Busay sa barangay Busay nga may pinusilan sa ulo ug baba.

Usa ka Lyndon Pancho,30, nga giingong kauban ni dela Cruz niadtong pagpatay maoy mitug-an sa mga imbestigador sa insidente human usab siya madakpi sa buybust operation sa Criminal Investigation and Intelligence Branch ning bag-uhay lang.

Si Roderos miangkon usab nga dunay watchlist ang PRO7 kung kinsa kadtong mga polis nga duna nay mga record kapares sa modus operandi ni dela Cruz.

Si Supt. Melvin Gayotin, deputy chief of the RIDMD  sa pakighinabi sa  Banat News mitug-an nga dunay gibana-banang 20 ka mga polis sa tibuok Central Visayas ang gidudahan usab nga nalambigit sa maong modus operandim ug laing pamaagi sa pagpangilkil.

Si Gayotin miawhag sa mga reklamante sa paghingusog sa ilang reklamo pinaagi sa pagpasaka og pormal nga kiha batok sa maong mga polis.