Pabling ug Gwen giisnab sa Dalaguete

Gibati’g kabalaka si Kongresista Pablo Garcia  sa ikaduhang distrito sa lalawigan sa Sugbu sa  pagkabahinbahin karon sa mga lider sa kabarangayan sa lungsod sa Dalaguete.

Kini sa dihang 14 ra sa 33 ka kapitan sa barangay ug 18 ka mga tsirman sa Sangguniang Kabataan nga midaog niadtong miaging election ang nanumpa sa iyang atubangan ug ni Gobernador Gwendolyn Garcia niadtong Sabado.

Si  Garcia maoy mipapanumpa sa mga tsirman sa SK samtang  ang gobernador usab nga iyang anak maoy mipapanumpa sa 14, ka kapitan sa barangay.

Gibati’g kabalaka ang kongresista sa ikaduhang distrito sa dakong kalagmitan nga magtabu-agsa lang unya ang mga opisyal sa lungsod kun dili masulbad kining ilang kahimtang karon.

Maoy hinungdan nga siya ug ang gobernador nanghingusog gyud pag-awhag sa taga Dalaguete sa hingpit nga panaghiusa ug panaghugpong aron  dali rang ipabaha sa kagamhanan sa lalawigan ug sa kongreso ang mga nagkalainlaing kaayuhan alang sa tanan.

Nasuta sa gobernador nga ang bugtong yawe sa kahiusahan diha sa mga molupyo sa Dalaguete ilabi na sa mga opisyal sa lungsod way lain gawas kang Bise Mayor Ronald Allan Cesante.

Apan luyo sa ilang kabalaka nga si Cesante maoy maghatag labad sa ilang ulo, nalipay kaayo si  Garcia    dihang nakita nila ang kooperasyon ni Cesante pinaagi sa pagtambong niini sa oathtaking nga gihimo sa sports complex sa lungsod.

Si Cesante kinsa maoy nanguna sa ubang mga barangay captain nga iyang kaalyado pagtambong sa oathtaking sa mga mananaog nga kaalyado sa gobernador, misugat usab sa pag-abot sa amahan ug anak nga Garcia didto sa Dalaguete ug misaad kini nga makig-alayon na siya sa kagamhanan sa lalawigan .

Si Cesante maoy mayor kaniadto sa maong lungsod , apan tungod kay third termer na siya , mikandidato siya pagka bise mayor niadtong miaging election sa Mayo ug midaog.