Gipasusi na sa Office of the Building Official kon OBO sa siyudad sa Sugbu kagahapong adlawa ang tanang billboard sa dakbayan.
Kini aron pagsuta kung pila niini ang walay permit gikan sa City Hall ug illegal nga gipangtukod sa kadalanan sa siyudad.
Matod ni Engineer Josefa Ylanan sa OBO nga ang ocular inspection gipahigayon human usab sa ilang panagtigom sa kadagkuan sa Outdoor Advertisers sa Sugbu.
Nasabutan sa maong tigom nga ang asosasyon na ang mangayo og certification sa kontraktor sa structure sa billboard labot sa kalig-on niini.
Karong adlawa miingon si Ylanan nga subli niyang ipainspeksyon sa iyang mga sakop ang mga billboard sa dakbayan aron pag-counter check sa gihimo niining inspeksyon kagahapon sa dili pa i-demolish ang illegal nga mga billboard.
Giklaro ni Ylanan nga sayon rang ilhon ang illegal nga mga billboard tungod kay dili ibutang ang identification sa agency sa ubos nga bahin sa advertisement.
Miingon si Ylanan nga posibling giapil na sa maong report sa VECO ang mga billboard nga nahimutang gawas sa siyudad.
Giklaro hinoon ni Ylanan nga iyang ipa-demolish ang mga billboard nga masuta sa inspection team nga illegal nga gipangtukod.
Ang gihimong lakang sa OBO gipahaom usab sa kamanduan ni Mayor Tomas Osmeña, human sa paghuros sa bagyong Lando dinhi sa Sugbu.
Labing minos upat ka mga billboard sa siyudad ang nangatumba ug usa niini ang giingon ni Ylanan nga illegal nga gipabarug.