Manager sa negosyanteng Hapon nga gipatay sa milabay’ng semana didto sa dakbayan sa Mandaue wala na mohatag og kooperasyon sa imbestigasyon sumala pa ni Mandaue City Police director Sr. Supt. Rodel Calungsod.
Matud pa ni Sr. Supt. Calungsod nga wala gyud mopaubos sa lie detector test si Efren Rosales, ang manager sa HK Travel Agency nga gipanag-iya sa gipatay nga si Hiroshi Kusaka.
Base sa nadawat nga report ni Calungsod gikan sa CIDG-7, si Rosales motunga ngadto sa ilang buhatan apan dili gyud kini mopaubos sa maong lie detector test gumikan sa rason nga kini operado sa iyang kasingkasing.
Hinuon matud pa ni Sr. Supt. Calungsod nga dili nila mapugos si Rosales sa maong test gumikan kay iya kining katungod, apan kun kini walay gitaguan sa nahitabong krimen sa iyang amo dili kini angayan nga kahadlokan.
Apan ang uban niining mga empleyado sa HK human na ang pagpaubos sa lie detector test ug nagpaabot na lang si Calungsod sa resulta niini.
Subay niini, dili pa matawag nga suspek si Rosales sa kamatayon ni Kusaka gawas kun adunay laing ebidensiya nga maglambigit kaniya ngadto sa pagbanhig-patay sa negosyanteng hapon.
Samtang wala pa gihapon makatubag si Rosales sa kasong obstruction of justice gumikan sa iyang pagdalidali og sugo sa mga trabahante sa Mandaue City Hospital sa paghugas sa dugo sa iyang L300 van nga maoy giluwanan ni Kusaka sa dihang kini gibanhigan- patay niadtong petsa 13 ning bulana sa dalan Plaridel ug Ouano, dakbayan sa Mandaue.