Napakyas sa pagpatim-aw ang drayber sa usa ka Japanese national nga gipusil patay sa duha ka wala mailhing lalaki nga nagsakay og motorsiklo sa miaging semana sa dakbayan sa Mandaue alang unta sa lie detector test nga pagahimoon sa PNP Crime Laboratory.
Si Sr. Supt. Rodel Calungsod, hepe sa Mandaue City Police Office (MCPO) ug mao usab ang nangulo sa Special Task Force Hirushi Kusaka miingon nga si Efren Rosales napakyas sa pagpatim-aw alang sa pagahimuon untang lie detector test.
Dugang pa niya nga gidapit unta nila si Rosales alang sa pagpahigayon og lie detector test niadtong Miyerkules apan wala kini mosanong sa ilang pagdapit.
Si Rosales maoy manager sa usa ka travel agency nga gipanag-iya sa gipatay nga Hapon ug mao kini ang nagsilbeng drayber sa pagpaingon sa Mactan Cebu International Airport alang sa paglarga unta niini paingon sa Japan.
Sa paghidangat sa dalan Gerardo Ouano ug dalan J. Plaridel sa barangay Umapad sa maong dakbayan kalit lamang kining gipusil sa nagsunod nga duha ka lalaki nga nagsakay og motorsiklo.
Nagdali pagsibat ang duha ka lalaki ug si Rosales dali usab nga mihatod sa biktima ngadto sa Mandaue City District Hospital diin didto gideklarar sa mga doktor ang biktima nga patay na kining nahidangat sa maong tambalanan.
Samtang si Rosales didto sa maong tambalanan dali usab nga nakahangyo sa utility worker sa pagpahugas sa mga dugo nga diha sa sakyanan nga gilingkoran sa gipatay nga Hapon.