Kagawad nag-'quary' sa sapa gisikop

Gidakop sa mga sakop sa Mobile Patrol ug Special Weapon and Tactic (SWAT) ang midaug nga numero unong konsehal sa barangay Canduman sa dakbayan sa Mandaue  tungod sa  ilegal nga pagpangubkob og bas sa Butuanon river.

Si PO2 Leoncio Yoyong Canoy miila sa gidakop nga   si Kagawad Dalmacio Zanoria kinsa midaog nga konsehal sa habig sa oposisyon.

Matud pa ni PO2 Canoy nga naabtan kagahapon sa buntag sa mga sakop sa Mobile Patrol ug SWAT ang duha ka dumptruck ni  Zanoria nga magkarga og bas.

Dugang pa niya nga nakamatikod ang drayber sa maong mga dumptruck ni  Zanoria ug nakahigayon kini sa pagpadagan pahilayo sa maong dapit.

Gisundan sa mga sakop sa SWAT ug Mobile Patrol  ang maong mga dumptruck ug naabtan nga didto na kini sa sulod sa compound sa pabrika sa hallow block nga gipanag-iya sa maong konsehal.

Gikandadohan og dagkong kadina ang ganghaan sa maong pabrika sa hallow block ug ang mga polis sa gawas nagpaabot na lamang nga ablihan alang sa pagkuha sa mga dumptruck isip ebidensiya sa kasong ilang ipasaka batok niini.

Ang bag-ong barangay kapitan sa Canduman nga si   Kapitan Leo Javas nga gikahinabi sa Banat News miingon nga iyang gikahinabi si   Zanoria ug gipanghimakak ang maong pasangil kaniya.

Matud pa  ni   Javas nga dugay na nga gihungihong ang  kalambigitan  ni  Zanoria sa pagpangobkob og bas sa maong dapit.

Dugang pa niya nga hayan nga nataymingan na sa mga polis ang gihimong pagpangubkob sa maong kagawad sanglit dugay na man usab nga gipanid-an ang ilegal niining kalihukan.