Personal nga mipaubos sa paraffin test ug ballistic examination sa iyang armas ang usa ka polis nga gitumbok nga maoy mipusil sa iyang gikaatraso nga sibilyan didto sa H. Abellana extension Pagsabungan, dakbayan sa Mandaue sa milabay'ng Nobiyembre 15 sa gabii.
Matud pa ni SPO1 Roberto Hugo sa Station 3 sa Mandaue City Police Office nasayran nga human mipanghimakak si SPO1 Rey Jaron sa pagpusil sa iyang kaatraso nga si Paraquiles Carsido, 24, ulitawo ug residente sa Jugan, lungsod sa Consolacion mitanyag kini sa iyang kaugalingon nga ipaubos sa paraffin test ug ballistic exam sa iyang service firearms ngadto sa PNP Crime Laboratory aron kalimpiyohan ang iyang ngalan sa maong alegasyon ni Carsido.
Hinuon miangkon si Jaron nga aduna silay personal nga atraso ni Carsido apan wala kini moangkon nga siya ang mipusil ni Carsido sa dihang nagkaabot ang ilang dalan sa Pagsabungan ug andam siya moatubang niini kun mopasaka og kaso batok kaniya.
Samtang gipaabot usab ni SPO1 Hugo si Carsido nga mopakita sa iyang kaugalingon sa station 3 alang sa pagpasaka og kaso batok ni SPO1 Jaron, apan hangtod ning pagsuwat wala pa gyud mopakita sa iyang kaugalingon si Carsido.
Kahinumduman nga si Carsido mitumbok ni SPO1 Jaron nga maoy mipusil kaniya sa milabay'ng Nobiyembre 15 sa gabii ning bulana human subling nag-abot ang ilang dalan diin daan na sila adunay panagbangi.