CEBECO-2 naningil og mahal sa Koreano giduphan

Giduphan ni Bokal Jose  Ma. Gastardo ang mga opisyal sa Cebu Electric Cooperative (Cebeco-II) gikan sa alegasyon nga pagpangayo og sobra ka dako kaayong bayranan ngadto sa usa ka Koreano nga buot magpataod og linya sa kuryente alang sa iyang gipanag-iya nga Korean Retirement Village didto sa barangay Don Virgilio lungsod sa Medillen Cebu.

Gibutyag ni Gastardo nga alang niya sirado na ug wala kinahanglana ang pagpahigayon og imbestigasyon may labot niini human misanong ang general manager sa Cebeco-II nga si Alan Peter Seneres sa milabay'ng sesyon sa hunta probinsiyal.

Nasayran nga si Medillen Mayor Ricardo Ramirez misumbong ngadto kang Gobernador Gwendolyn Garcia may labot sa pagpaningil og P2 milyones sa Cebeco-II ngadto sa maong langyaw bugti sa pagpataod og kaugalingong linya sa kuryente sa village niini.

Apan giinsister ni Gastardo nga na-misinform lang  si Ramirez ug wala kini masayod nga gikunhoran ang maong kantidad.

Matud ni Gastardo tinuoray nga P2 milyones ang gihatag nga estimate sa bayranan sa Cebeco-II ngadto sa maong langyaw dihang nawngayo kini og quotation apan gikunhoran kini og P1.3 milyones dihang giaprobahan sa mga sakop sa board ang hangyo niini.

Gawas niini miabot na lang og P540 mil ang gitakda untang bayranan sa maong langyaw human nagkasinabot kini uban sa mga kadagkuan sa Cebeco-II ubos sa kondisyon nga mopalit kini og kaugalingong transformer.

Nasayran nga pagkakaron giduso sa hunta probinsyal ngadto sa committee on laws ang maong reklamo alang sa dugang mga pagtuon.