Sayop nga proklamasyon gihinaot dali maresolbar

Si Comelec Regional Director  Rey Rene Buac nanghinaot nga maresolbar sa dili pa sa Nobiyembre 30   sa Comelec Manila ang tanang petition sa mga kandidatong naproklamar nga dili unta maoy tinuoray nga  mananaog sa barangay ug SK election.

Si Buac nagkanayon nga mipasalig kaniya si Comelec commissioner Resurreccion Bora nga  ilang humanon ang maong problema aron kadtong mga tinuoray'ng  midaog makahimo sa ilang serbisyo nga gihatag nga mandato kanila sa katawhan.

Matud pa niini nga nagpaabot na lang sila karon sa resolution nga giduso sa  Comelec Manila labot sa pagresolbar sa mga "erroneous proclamation" human usab ma-proklamar gumikan sa  sayop nga pag-ihap sa mga balota.

Sumala pa niini nga dali ra kaayo ang maong isyu ma-resolbar sa Comelec gumikan kay mga errors lang sa pag-ihap ang ilang resolbahon ug ang proclamation nga nahimo human sa inihapay apan sa panahon nga mapalabang na ang resolusyon alang niini ila gilayong ipatuman sa labing madaling panahon kini aron makalingkod sa Nobiyembre  30 ang mga bag-ong official.

Iyang gibutyag nga dinhi lang sa  Sugbu adunay dili mominos unom ka mga errors sa pagkwenta niadtong milabay'ng barangay election ang tua pa karon didto sa kaulohan apan bisan pa man sa pagsubay sa  saktong proseso dali kaayong maresolbar hinungdan nga makalingkod gyud kadtong tinuoray'ng napili.

Apan samtang wala pa ang resolution sa Comelec Manila kadtong mga naproklamar nga sayop sa mga Board of  Election Tellers magpadayon  sa pagserbisyo sa kabarangayan hangtod ma-serve ang desisyon-