Pangayo, paghatag pinaskohan sa mga 'haoshao' media gidili

Higpit nang gidid-an karon ang kapolisan gikan sa pagpangayog pinaskohan ug sa paghatag usab ug amot niadtong gitawag nilang “haoshao” kun way klarong sakop sa media.

Ang maong kamandoan gihimo ni Director General Avelino Razon Jr,  sa Philippine National Police (PNP) nunot sa pagkaguba nag maayo sa dungog sa kapolisan gumikan sa pangilkil.

Apan sa pagkatinuod miingon si Razon nga daghan usab nga taga media nga mangilkil sa kapolisan ilabi na ning panahon sa Pasko pinaagi sa pagpangayo og amot alang kunohay sa ilang mga “christmas party”.

Apan tungod kay may taga media usab nga gitawag nilang haoshao diin usa  sa rombo niining kilkilanan mao ang mga opisyal sa polis, gibaoran usab ni Razon ang mga opisyal nga likayan ang maong matang sa taga media.

Sa laing bahin, si  SPO4 Elesia Bautista sa buhatan ni Cebu City Police  Office (CCPO) Director Patrocinio Comendador nagkanayon nga matag tuig  gipatuman sa kapolisan kining maong balaod.

Matud pa niya  nga bisan wala pa madawat nila ang maong direktiba dinhi sa Cebu apan nasayod na silang daan sa maong balaod.

Midugang siya nga hingpit kining gituman sa kapolisan sanglit  nasayod sila sa ka-estrikto karon sa ilang mga kadagkoan diin kutob sa polis nga molapas sa mga reglamento dihadiha pahamtangan dayon og silot.

Si Razon sa iyang mando, nag-awhag usab sa katawhan sa dili paghatag og kuwarta ngadto sa polis nga mangumusta kanila uban sa pag-ingon nga “merry christmas” o maayong Pasko.

Gani gidasig ni Razon ang publiko nga kutob sa polis nga mangilkil kanila kinahanglang makadangat sa iyang buhatan pinaagi sa pag-TXT ngadto sa PNP 2920-09178475757.