11 ka jailguards sa OSC naproblema

Nag-atubang karon og problema ang 11 ka jail guards nga gidestino diha sa Operation Second Chance lakip na ang warden niini nga si Sr. Insp. Jennifer Joyce Abar.

Kini human mapugahi og pito ka mga minor de edad ang nahisgutang sentro sa  miaging Lunes sa hapon atol sa paghuros sa bagyong Lando.

Nasayran nga si Abar girilebohan na sa katungdanan sugod kagahapong adlawa samtang kini gipaubos sa imbistigasyon.

Ang kasamtangang gihulip kang Abar sa posisyon mao si Insp. Merlina Metante nga gikan sa Mandaue City Jail.

Samtang ang tulo sa mga guwardiya sa sentro pasakaan usab og tukmang kaso human ireklamo sa mga minor de edad nga nimaltrato kanila.

Matud ni konsehal Gerardo Carillo nga usa sa mga minor de edad nga nasikop pagbalik ang mipasangil sa tulo ka guwardiya nga mohapak og tubo sa ilang lapa-lapa.

Kini samtang sila ibutang sa isolation cell ilabi na kun sila giingong makahimo og laing kalapasan diha sa sentro.

Nagdumili hinuon ang konsehal pagbutyag sa pangalan sa tulo ka mga guwardiya samtang nagpadayon pa ang gihimo niining pakisusi.

Sa pikas bahin, wala matagbaw ang co-chairperson sa management board sa sentro nga si Margot Osmeña sa pagpasabot nga gihimo sa warden niini.

Ang warden miingon nga wala mabantayi sa guwardiya ang paggabas sa rehas sa isolation cell atol sa bagyo hinungdan nga ang pito naka-eskapo.

Apan ang gikalagutan sa unang ginang sa dakbayan tungod kay sa Banat News pa nahibalo nga dunay pagpuga sa mga minor de edad nga nahitabo sa sentro.

Giangkon hinuon ni Abar ang iyang kasaypanan sa wala dayon pagtaho sa maong hitabo ngadto sa kadagkuan sa Operation Second Chance

Nagdumili hinuon si Margot pagluwat og bisan unsang rekomendasyon batok sa warden ug sa mga guwardiya sa Operation Second Chance.

Apan si Mayor Tomas Osmeña mipahibalo na pagputol sa tag-usa ka libo ka pesos nga binuwan nga allowance, sa 11 ka mga guwardiya.

Gawas sa pagputol sa incentive allowance ang mayor subli usab nga mihingalan sa mga personnel sa BJMP nga mga kurakot tungod sa iyang kasagmuyo sa maong hitabo.

Samtang pa-imbestigahan usab sa mayor ang mga house parents ingon man ang mga social worker nga gi-assign sa sentro tungod usab sa kapakyas niini pagtaho sa insidente.

Sa kasamtangan, upat na lang sa pito ka mga minor de edad ang wala pa masikop pagbalik human mosurendir ang usa niini kagahapon.

Ang Operation Second Chance duna karoy 70 ka mga minor de edad nga nag-atubang og nagkalain-laing mga kaso sama sa theft, robbery ug uban pa.