Mas bug-at nga silot sa mga mamuhatay og eksplosibo

Pabor si konsehal Yayoy Alcoseba sa balaodnon nga magpahamtang og mas bug-at nga silot niadtong masakpang ilegal nga manghimo ug maghupot  og mga explosives.

Ang konsehal nga maoy Vice Chairman sa Committee on Public Order and Safety sa City Council nagtuo nga sa maong paagi mahadlok na unya ang mga tawo paghupot niini.

“Maayo kaayo na, okey kaayo na nga patas-an ang silot kay aron magduha-duha na ang ubang mga tawo paghupot ana,”sumala pa  ni Alcoseba.

Partikular nga gitumbok sa konsehal mao ang mga terorista nga giingong maoy sagad maghupot niini aron sa pagmugna og kasamok.

Nasayran nga gipahigayon na ang committee hearing sa balaodnon ni Nueva Ecija congressman Rodolfo Antonino ug posibleng kini maduso na sa plenary alang sa debate.

Kun maaprobahan ug mahingpit nang balaod ang proposal sa kongresista mahimo na unyang life sentence ang silot niadtong ilegal nga mohimo ug maghupot og mga explosives.

Sa kasamtangang balaud, perpetual temporal lang ang silot o hangtud sa 20 ka tuig nga pagkabilanggo gawas nga gitugotang makapyansa ang mga suspetsado.

Apan sa balaodnon ni Antonino, dili na tugotang makapyansa ang si bisan kinsa nga mag-atubang og kaso may kalabutan sa ilegal nga pagpanghimo ug paghupot og explosives.

Gitataw hinuon ni Alcoseba  nga iya unang sutaon ang kinatibuk-ang unod sa maong balaodnon una mopasar og resolusyon sa City Council nga magsuporta niini.

Una nang  miawhag si Presidente Gloria Macapagal Arroyo ngadto sa mga magbabalaod nga mopalabang og measure nga maghatag og bug-at nga silot sa nahisgutang salaud.

Kini human usab paulbuha ang Batasan Pambansa complex niadtong  miaging semana  nga mikalas  og upat ka kinabuhi ug miangol sa pipila ka kawani sa Kongreso.

Lakip sa mga nakalas sa nahisgutang insidente mao ang kongresista sa Basilan nga si Wahab Akbar.

Samtang lakip usab sa nangaangol mao sila si party-list representative Luzviminda Ilagan ug Negros Oriental congressman Henry Teves.