‘Gun-for-hire’ nadakpan sa CIDG-7

Usa ka gidudahang contact sa mga gun-for-hire ang nasikop sa mga sakop sa Criminal Investigation and Detection Group-7 atol sa gipahigayong ronda diha sa barangay Quiot niadtong milabay’ng Domingo sayo sa kaadlawon.

Ang nadakpan giilang si Ireneo Baclayon, Jr. 53, residente sa maong dapit kinsa sumala pa ni Sr. Supt. Jorge Corpuz nagtinil og daghang mga armas diha sa iyang panimalay.

Si Baclayon gikatahong maoy tighatag og armas nga gamiton sa gun-for-hire nga naay patyon dinhi sa Sugbu base sa mga impormasyong ilang nadawat hinungdan nga mikuha sila og search warrant sa korte.

Mipagawas sa search warrant si RTC branch 15 Presiding Judge Fortunato de Gracia tungod sa paghupot og mga armas. Kini human nila makumpirmar sa Fesagss-7 nga usa ray lisensyadong armas ni Baclayon.

Atol sa ronda, nakuha diha sa balay ni Baclayon ang usa ka Norinco caliber 45 pistol, usa ka Colt .45 pistol, usa ka .38 caliber revolver, usa ka .45 magazine, usa ka pugakhang, duha ka .22 airguns nga dunay mga silencers, 16 ka buhing bala sa kalibre 45, 10 ka buhing bala sa kalibre 38, usa ka espada nga double blade ug duha ka balisong.

Si Corpuz mitug-an nga tungod sa mga sensational nga mga kasong pagpatay karon nga nanghitabo  dinhi sa Sugbu, tanang impormasyong sa ilang tan-aw makatabang og dako sa imbestigasyon ila dayong lihukon.

‘This guy is supporting a group involved in gun-for-hires and bank robbery groups. He used to be a former Sparrow and involved in gun-for-hire, now he is retired. I just want to say that the police and the task force are always doing our job acting on all information we received,” asoy pang Corpuz.

Niadtong milabay’ng semana sa adlaw’ng Martes, usa ka Hiroshi Kusaka, usa ka Hapones nga nagnegosyo dinhi sa nasud ang gibanhigan diha sa eskina sa dalan J.Ouano ug Plaridel sa dakbayan sa Mandaue.

Duha ka wala mailhing lalaking sakay og motorsiklo ug armado og kalibre 45 pistola ang gitumbok nga mipusil sa biktima, gitutukan sa kapolisan ang anggulo sa negosyo ug personal niining problema.

Samtang ang drayber ni Kusaka nga si Efren Rosales gikatakdang ipailawom sa polygraph test kabahin sa hitabo, si Rosales gikasuhan sa kapolisan og obstruction of justice human niini gikatahong misugo sa usa ka janitor sa hospital nga gidad-an sa iyang agalon nga hugasan ang dugo sa maong van.

Gisusi pa sa CIDG-7 kung unsang mga krimen ang gikalambigitan ni Baclayon dinhi sa dakbayan pinaagi sa resulta unya sa ballistic test sa mga armas nga nakuha gikan sa iyang balay.

Si Baclayon sa iyang bahin dihang gihinabi sa mga tigbalita mihimakak sa pasangil nga siya usa ka gun-for-hire kaniadto ug dili usab siya contact sa mga gun-for-hires sa dakbayan.

Sumala pa niya maong duna siya’y armas tungod sa kapeligro sa iyang seguridad sanglit kaniadto usa siya ka police informant sa Criminal Investigation and Intelligence Division sa Cebu City Police Office ug kanhi nagtrabaho isip sakop sa Civil Security Unit sa Cebu City Hall.

Midugang siya nga wala siya’y kalambigitan sa mga krimen dinhi sa Sugbu ug nanginabuhi lang pinaagi sa pagpaninda diha sa barangay Quiot.