Toro-toro gikonpirmar sa CCAIB

Gikonpirmar sa Cebu City  Anti-Indecency Board (CCAIB) nga adunay toro-toro kun live-show sa lalaki ug babaye nga mag-sex ibabaw sa entablado sa mga balay kahilayan sa dakbayan sa Mandaue.

Si Dr. Rene Josef Bullecer, chairman sa CCAIB ug presidente sa Aids-Free Philippines, nagkanayon nga kaniadto pa siyang misurender sa pagpanggukod sa toro-toro sa dakbayan sa Mandaue.

Matud pa ni Bullecer nga niadto pa sa panahon ni Mayor Thadeo Ouano nga ilang gipanggukod kining toro-toro sa Mandaue.

Si Bullecer mipasabot nga sa panahon ni  Ouano ilang giduso ang paghulma og   Multi-Cities Anti-Indecency Board sa silingang dakbayan aron mapugngan ang problema sa toro-toro.

Apan napakyas sila sa pagpadayon niini human ang mga representante sa Mandaue mipadayag nga dili kini mahimo gumikan kay wala silay ordinansa nga  gipanday  ang  dakbayan nga moggukod sa toro-toro.

Nunot sa maong kalambuan misamot usab og kahinay ang ilang kampanya batok sa toro-toro ug ubang mga malaw-ay nga pasundayag sa mga entablado sa kahilayan gumikan sa kakulang og pundong tawo.

Dugang niini nga nunot sa ilang kapakyas niadto hangtod karon nagpabiling  misamot  og kadako ang problema sa toro-toro sa maong dakbayan diin inila na kaayo sa mga silinganang dakbayan ug lungsod ug sa ubang lugar.

Sumala pa niini nga ang dakbayan sa Mandaue karong mga panahona mao nay sentro dinhi sa Sugbu kun hisgutan ang mga kahilayan gumikan sa pagsulbong sa daghang mga bikini bar.

Sagad sa mga batan-on ingon man taga laing lugar ang mga moduaw dinhi sa  Sugbu mohisgot gyud sa mga pasundayag sa Toro-Toro.

Giangkon usab niya nga dili  nila masayon-sayon sa pagpangronda ang maong mga balay kahilayan gumikan kay abtik kaayo kining makabantay kun dunay operasyon batok niini.

Subay niini, iyang giawhag si Mayor Jonas Cortes  nga mohimo og lakang batok ning pasundayag sa toro-toro aron malimpiyohan sa pagbalik ang maayong moralidad sa dakbayan.

Sa nasayran nga ubay-ubay na sa mga asawa og construction workers  ang mipadangat sa ilang reklamo labot  ning toro-toro gumikan kay gikabuangan kini sa ilang mga bana.

Samtang ilang gikasagmuyo gumikan kay ang mga opisyal sa dakbayan sa Mandaue ingon man sa kabaranggayan walay gihimo sa pagpahunong sa maong kalihukan.