Bugas para sa  mga drayber ilad ra

Ang secretary general sa Bayan Muna Central Visayas Arman Perez mihulagway nga usa ka pagpangilad ngadto sa mga sakop sa drayber dinhi  sa dakbayan sa Sugbu ang lakang sa dakbayan nga paghatag ug rice subsidy aron dili mosalmot sa lihok protesta pagpangayog dugang pletehan sa mga PUJ.

Si Perez nga nahinabi sa Banat News mingon nga walay maayong samputanan ang gihimo sa city hall gumikan kay tataw nga usa ka pagbugalbugal sa katungod sa mga drayber aron lang dili mosalmot sa pagpangayo og  usbaw sa pletehan.

Si Perez miingon nga angayan respetohan unta sa dakbayan ang katungod sa mga drayber nga gipangayo nga naglantaw sa ilang pamilya nga  madugangan ang ilang income gumikan sa pagsulbong sa presyo sa gasolina.

Iyang gipasabot nga ang dakong kuwestiyon sa maong rice subsidy kun asa kini kutob kun molungtad ba ang pagtabang sa mga pamilya sa mga drayber.

Alang kaniya angayang pangitaan unta sa gobyerno og insaktong solusyon kining maong problema ug dili usab magpa-alig-alig ang dakbayan nga mohatag og bugas apan igo lang molungtad sa pipila ka adlaw nga kulang kaayo sa panginahanglan sa mga pamilya sa mga drayber.

Sa nasayran nga si Mayor Tomas Osmeña mipahibalo ning maong lakang nga mopagawas siya og 30 milyones pesos alang sa mga drayber nga dili mosalmot sa protesta pagpangayo'g dugang pletehan nga ipaagi sa Department of Social Welfare and Development (DSWD).