Dakbayan sa Talisay ang nagkinahanglan og dugang mga polis nga matahasan sa pag-monitor sa mga areas of concern sama sa commercial nga lugar ug vital installation sa dakbayan matud ni Police Superintendent Romeo Perigo hepe sa kapolisan sa Talisay.
Gibutyag ni Perigo nga suwayan niya og hangyo ang Provincial Police Headquarters kung aduna bay mga polis nga pweding madestino sa Talisay apan kung wala hangyoon niya ang mga kapitan diin mahimutang ang mga areas of concern nga modestino og mga tanod diha sa mga highway ilabi na panahon sa gabii nga makaayuda sa mga polis.
Sa tubag sa panawagan ni Kongresista Eduardo Gullas batok sa ilegal nga sugal ug drugas, ang kapolisan mipahigayon og sunod-sunod nga mga operasyon batok sa mga ilegal nga sugal ug gani sa milabay’ng mga semana nakakompiska na sila og sobra sa 20 ka makinang pasugalan ug nakasikop na og mga suspetsadong sugarol.
Ang hepe nagkanayon nga dili lang mga video karera ang ilang gipahigayonan og operasyon tanang klase sa ilegal nga sugal sa siyudad ang ilang gipangsikop.
Apan wala pa mobutyag si Perigo kabahin sa ilang kalihokan kabahin sa ilegal nga drugas diin matud pa niini nga padayon pa ang ilang operasyon karon ug nagkinahanglan pa usab nga kompletohon nila ang mga dokumento nga gikinahanglan sa Provincial Drugs Enforcement Agency aron mahimong legal ang ilang kalihokan.
Si Perigo nagkanayon nga ang kapolisan kanunay’ng nagpahigayon og kalihokan pagmentenar sa kahapsay ug kalinaw sa dakbayan apan sa mga milabay’ng buwan ang kapolisan naukopado kini tungod sa mga selebrasyon ug kasaulogan nga naglangkob sa pista sa siyudad, eleksiyon sa Barangay ug Sangguniang Kabataan ug pagsaulog sa adlaw sa mga Santos ug patay.
Ang hepe mipasalamat ngadto sa mga residente sa siyudad kinsa mihatag og ayuda kanila pagsulbad sa ubang mga krimen ug miawhag kini ngadto sa publiko nga mohatag og ayuda sa kapolisan aron masumpo ang mga ilegal nga kalihokan ug krimen.