Gitun-an karon sa Maritime Industry Authority (Marina-7) ang pag-ban sa tanang mga pumpboat nga nagbiyahian gikan dinhi sa Sugbu paingon didto sa Isla sa Camotes human sa pagkalunod sa M/B Ave Maria-5 niadtong Martes sa hapon nga mikalas og tulo ka kinabuhi.
Gibutyag ni Engr. Mardon Martin, safety engineer sa Marina-7 nga mag-agad kining maong laraw sa mamahimo unyang resulta sa himuong imbestigasyon may labot sa pagkalunod sa M/B Ave Maria-5.
Matud ni Martin karong Lunes pormal nga mosugod ang ilang imbestigasyon human usab nakaduso na sa marine protest niadtong Huwebes ang kapitan sa maong motorbanca nga si Riel Florentino.
Atol sa pagsugod sa imbestigasyon ipatawag ang kapitan ingon man ang tag-iya sa M/B Ave Maria 5 nga si Konsehal Riza Borlosa, sa Poro aron kakuhaan og mga pamahayag kabahin sa maong panghitabo.
Sentro sa tutokan sa imbestigasyon mao ang posibleng lapses nga maoy hinungdan sa maong trahedya nga mikalas sa magtiayong sila si Magdaleno ug Victoria Maranan ug ang usa ka Catalina Betog nga pulos taga Tudela, Camotes.
Nasayran nga gi-hold sa Marina-7 ang pagbiyahe sa maong motorbanca hangtod nga matapos ang gipahigayong imbestigasyon ignon man gisuspenso una ang lisensiya sa kapitan niini.