Taxi driver gitulis, gipatay

Patay na nga napalgan diha sulod sa iyang gimanehong taxi ang  usa ka 34-anyos nga lalaki niadtong Huwebes sa gabii diha sa Sitio Antipolo, Barangat Linao dakbayan sa Talisay.

Ang kapolisan sa dakbayan miila sa biktima nga si Alejandro Generola, minyo, lumad nga taga lungsod sa Argao, drayber sa TSI taxi nga nagtangag sa plakang  GXC-654.

Si Generola nakaangkon og usa ka samad pinusilan sa tuong bahin sa likod sa ulo diin ang bala milahos ngadto sa iyang walang aping ang gituhoan sa iyang kamatayon.

Usa ka nagpakabanang residente sa lugar ang mitaho sa kapolisan kabahin sa maong hitabo kinsa ang mga sakop sa alert team ug homicide section SPO1 Ricardo Balbutin ug PO2 Harrison Quiñanola ang miresponde sa alarma.

Ang kapolisan sa Talisay nangayo og ayuda sa Scene of the Crime Operation (SOCO) nga gipangulohan ni Police Inspector Diomedes Casul alang sa imbestigasyon sa insidente.

Si Quiñanola sa pakighinabi niini sa Banat News kagahapon nagkanayon nga ang SOCO mideklara nga walay kalambigitan sa tulis ang hitabo diin ilang napalgan ang pitaka ni Generola sa walang bahin nga pultahan kilid sa driver’s seat.

Sulod sa pitaka ang P270 nga salapi ug ang temporary driver’s license sa biktima.

Apan ang caretaker sa unit nga si Mina Calibog ang mi-insister nga gitulis si Generola.

Si Mina nagkanayon ngadto sa mga polis nga kasagaran ibutang ni Generola ang iyang kita sa pasada sa gamay’ng kahon tunga-tunga sa dash board diin paghiling sa mga polis niini wala kini sulod nga kwarta.

Ang maong caretaker ni Quiñanola pa nagkanayon nga imposibleng walay kita si Generola tungod kay alas 10:00 sa buntag sa maong adlaw nagsugod og pamasada.

Si Quiñanola midungag nga usa ka drayber sa habal-habal ang nakakita nga adunay pasahero si Generola nga naglingkod sa front seat dihang misulod kini sa lugar.

Ang taxi nga gimaneho sa biktima ang naa karon sa crime laboratory niining dakbayan aron sa pag-establisar og dugang pang ebidensiya sa hitabo.