Duha ka mga lalaki ang gipatay sa managlahing dapit dinhi sa dakbayan kagahapon sa kaadlawon, ang usa kanila misuway lang og tabang sa kaubang hubog nga miambak sa dagat diha sa barangay Duljo-Fatima.
Wala na makaabot nga buhi sa tambalanan si Philip Alferez, 29, operator sa sinehan human kini dunggaba sa suspek nga si Jeffrey Vestil, residente sa sitio Punyang sa barangay Duljo-Fatima.
Ang biktima gikatahong gipusil sa suspek kinsa gituuhang hubog niadtong tungura human niini luwasa ang ilang kainom nga si Noel “Dodong” Anco kinsa tungod usab sa ka hubog, milayat sa dagat ilawom sa balay sa ilang giimnan.
Ang biktima pagkakita kang Anco daling milayat sa dagat ug giluwas si Anco, apan ang suspek gikatahong milakaw ug sa pagbalik kalit nga gipusil ang tuong bahin sa ulo ni Alferez ug nahagbong kini sa dagat.
Ang mga residente mitabang og kuha kaniya ug gidala sa kapilya apan sa pagsusi sa mga sakop sa Emergency Rescue Unit Foundation gikatahong wala na kini magginhawa.Ang suspek dali usab nga nilayas sa dapit.
Samtang pagka-alas dos pasado sa kaadlawon, usa ka habal-habal driver nga giilang si Reynante Villanueva, 40, taga dalan F.Arcilla sa barangay Mabolo ang gidunggab patay.
Gitumbok nga mipatay kaniya mao ang mag-half brothers sila si Kurt Winnie Tudtud alyas Jetjet, usa ka construction worker ug Philip Baquerpo, nga silingan niini.
Sa imbestigasyon sa Homicide Section pinanguluhan ni PO3 Geoffrey Gutual, ang biktima kasamtangang nagpaabot og pasahero diha sa daplin sa dalan M.J. Cuenco sa eskina sa Juan Luna Ave. sa Mabolo dihang miabot ang duha.
Ang biktima gikomprontase sa mga suspek tungod sa giingong pagpamatid niini sa ilang igsuong babaye hinungdan sa mainiton nilang panaglalis apan kalit lang gitabangan og dunggab sa duha si Villanueva.
Ang biktima daling gidala sa Cebu City Medical Center apan gideklarar kining dead on arrival.