Ginamit nga condom gihimong lastiko gikabalaka

Ang presidente sa Aids Free Philippines, Dr.  Rene Josef Bullecer mipahimangno sa publiko nga likayan ang paggamit sa mga baratohong hair band nga ginama sa  ginamit nga condom  gikan sa nasud sa China.

Sa nasayran nga naalarma ang mga otoridad didto sa Guangzhou City habagatang bahin sa Guandong, China human usab mikusog ang halin sa maong produkto sa ilang lugar nga wala mag-agi sa makuting eksaminasyon diin posibleng nakalusot sa mga silinganang nasud sa Asya apil na ang Pilipinas.

Si  Bullecer nga nahinabi sa Banat News nagkanayon nga iyang gipanghinaot nga ang publiko mag-amping ning maong mga produkto kini tungod kay  alang kaniya dilikado kaayo nga adunay motapot nga mga bacteria sa lastiko.

Nagtuo siya nga bisan pa man kun gipaubos kini sa recycling ang mga used condom apan tataw nga walay assurance nga ang mga gihimong hair bands  nakalusot sa quality control gumikan kay adunay mga kemikal niini nga gigamit aron bag-o lang usab tan-awon.

Sa maong produkto hayan usab makuha ang nagkadaiyang sakit sa panit sa usa ka tawo sama sa allergy ug uban pa gumikan kay duna gyoy mga kagaw nga mahibilin niini sumala pa ni  Bullecer.

Matud pa niini nga bantayanan kaayo sa publiko labi na ang mga Pilipino nga  mahilig sa mga barato nga second hand gikan sa gawas gumikan kay hayan makuha ang bisan unsang matang sa sakit sama sa AIDS ug uban pang sexually  transmitted disease gumikan sa paggamit og lastiko gikan  sa condom nga gi-recycle.

Iyang giklaro nga ang mga silingang nasud sa Pilipinas mahilig usab kaayo nga molabay sa ilang mga basura dinhi sa ato gumikan usab kay dawaton man kini sa mga  Pilipino apan peligro sa panglawas.

Gawas lang sa ukay-ukay gikinahanglan gyud nga magbantay ang publiko ning maong mga produkto nga maghatag na hinuon og peligro sa ilang panglawas gumikan lang sa pagpili sa baratong produkto nga gikan sa gawas.

Gipasabot usab niini nga dili usab mabasol ang gobiyerno ingon man otoridad kini tungod kay mihimo usab sa ilang lakang apan kulang lang gyud sa personnel nga maka-monitor ning maong mga produkto nga gikan sa gawas nga gikahadlokang  mga kontaminado.