PO1 Lapinig gikasuhan

Gipasakaan na og kasong two counts of frustrated homicide ug physical injuries ang polis nga si PO1 Luther Lapinig kinsa gipasanginlang nakapusil og duha ka sibilyan dihang nakigsinukliay kini og bala sa laing polis niadtong milabay’ng Domingo sa buntag diha sa dalan Garfield sa barangay Pahina San Nicolas.

Si Sr. Supt. Patrocinio Comendador, director sa Cebu City Police Office mitug-an sa mga tigbalita nga ang nisang-at og kaso batok kang Lapinig mao ang duha ka mga biktima nga sila si Dario Encarnacion ug Rowel Abarri.

Si Abarri hangtud karon naa pa sa talandugong kahimtang human kini maigo og bala diha sa agtang milapos diha sa luyong bahin sa iyang ulo samtang si Encarnacion naigo diha sa tuong bahin sa ilong.

Samtang giapil usab og pasaka og kaso nga physical injuries kaniya bisan wala siya moapil sa pagkulata tungod kay wala kini gibuhat pagbadlong sa iyang igsuon nga si Donald ug ig-agaw nga si Reynan Espiritu samtang ilang gikulata ang magsuong sila si Leo ug Jeanne Nanoy.

Gikatahong daw nahimong “backup”  nila ni Donald ug Espiritu si PO1 Lapinig niadtong hitaboa sanglit nagtan-aw lang kini samtang naggunit og armas maong ang mga tawo nahadlok pag-ulang kanila sa ilang gihimo.

Si Lapinig gikapinusilay si PO3 Inocencio Lumayag, sakop sa Carbon Police Station kinsa nagpuyo diha sa dapit nga gihitaboan ug human gipangayoan og tabang sa iyang mga silingan.

Gipaabot nalang ang resulta sa paraffin test ug ballistic examinations aron pagtino kung kang kinsa gyung armas ang nakaigo sa mga sibilyan.

Si Comendador nagkanayon nga human nila ipasaka ang kaso, ipadala nila ang case folder ngadto sa Police Regional Office-7 aron maoy ihandos usab ngadto sa buhatan sa Regional Internal Affairs Service tungod kay makunsiderar nga moto propio case ang maong kaso.

Kini gumikan kay nalambigit man sa pagpabuto og armas ang duha ka polis nga maoy nalatid sa mga probisyon sa RIAS sa mga moto propio nga kaso.

Ning paagiha, kung dunay kwestiyon ang si bisan kinsa sa maong mga polis kung kinsa nakalapas sa rules of engagement mahimo nilang adto hikayon ang reklamo sa RIAS.