Toro-toro gialarma na sa Mandaue City

Naukay na usab ang mga sakop sa konseho sa dakbayan sa Mandaue subay ning mga nanggawas nga report nga mikusog na og maayo ang “toro-toro” sa mga balay kahilayan nga gikabuangan karon dili lang sa mga construction workers kun dili apil na niini ang mga opisyal sa kabarangayan.

Si Bise Mayor Carlo Fortuna nga nahinabi sa Banat News nagkanayon nga iyang awhagon ang mga tinugyanan sa Mandaue City Health Department pinanguluhan ni Dr. Oscar Quirante  aron makapahigayon og random inspection sa mga kahilayan nga mipasundayag og mga malaw-ay ibabaw sa entablado.

Si Fortuna miingon nga gikinahanglan usab nga masusi sa taga City Health Department ang mga babaye sa tanang mga bikini bar kini kun nahatagan ba og health card sa pagpamatuod nga limpyo ug luwas sa bisan unsang matang sa sakit.

Ang bise mayor mitataw usab nga sa pagkakaron wala pa gyud siyay nadawat nga pormal nga reklamo labot ning gikatahong toro-toro sa ilang dakbayan bisan kun nadungog na niya pipila na kahigayon.

“Ako ning himoan og aksyon gumikan kay dili  maayo nga magpadayon kining mga malaw-ay nga pasundayag nga makadaot sa imahen sa dakbayan hinungdan nga akong ipasusi sa taga City Health Department ug kun masuta nga duna gyoy toro-toro sa mga kahilayan hayan  iduso ang usa ka operations batok niini aron masikop kadtong mga mipasiugda”, matud ni Fortuna.

Sa nasayran ubay-ubay na sa mga asawa sa mga construction workers ingon man mga trabahante diha sa dakbayan sa Mandaue ang nangreklamo sa maong mga balay kahilayan nga gikabuangan karon sa ilang mga bana.

Samtang gikasagmuyo usab sa mga asawa gumikan kay ang mga opisyal sa mga barangay diha sa ilang dakbayan wala gyud mopakita og pagpakabana ning maong pasundayag.