Comelec-7 nanghinaw sa errors

Wala nay labot ang regional office sa Comelec sa isyu nga pag-desisyon niadtong mga naproklamar sa barangay election nga dili unta maoy tinuoray’ng nakadaog human usab sa pag-inihapay og usab.

Si Comelec Regional Director  Rey Rene Buac mipasabot nga ang pagdesisyon sa maong isyu ipaagi na kini ngadto sa ilang ulohang buhatan diin ang Comelec en banc maoy adunay jurisdiction.

Kini tungod kay ang regional office sa Comelec igo lang kining moabag sa  board of canvasser ug sa election officer sa usa ka lugar sa pagpreparar sa petition for corrections of error aron usab dili na magka-problema sa bayranan sa filing fee.

Matud pa niini nga ang election officer sa barangay election maoy adunay katungod sa pagduso sa maong report ug abag lang ang ilang tinuoray’ng gahum gumikan kay primary responsibility kini nilang magtutudlo nga nagserbisyo sa eleksiyon.

Subay niini, iyang giklaro nga kadtong naproklamar na og una nga dili unta maoy nakadaog magpadayon kini sa pagserbisyo isip usa ka de facto nga opisyal hangtod walay desisyon ang Comelec en banc batok niini.

Sa nasayran,  usa sa mga midaog nga barangay konsehal diha sa San Isidro Talisay ang mireklamo human usab  usa ka kandidato nga dili unta maoy nakadaog naproklamar human sa inihapay sa balota.