Hapon gipatay sa M'daue

Patay ang usa ka negosyanteng Hapon human kini gibanhigan sa duha ka tawo nga luwan sa motorsiklo didto sa dalan G. Ouano ug J. Plaridel, Umapad, dakbayan sa Mandaue samtang nagpaingon kini sa airport aron mosakay og eroplano pauli sa Japan kagahapon sa alas 6:30 sa buntag.

Si Hiroshi Kusaka, 49, lumad nga taga Tokyo ug tag-iya sa HK Travel Agency sa Nivel Hills, Lahug ning siyudad, ug kasamtangang nagpuyo sa Citylite Condominium sa Lahug, patay na’ng naabot sa Mandaue City District Hospital.

Duha ka lalaki nga armado og mubo nga armas, nagsul-ob og jacket nga itom ug nagsul-ob og crash helmet nga nagsakay og motorsiklo maoy mipusil ni Kusaka.

Sumala pa ni PO2 Dante Wenceslao nga si Kusaka luwan sa L300 van nga gimaneho ni Efren Rosales samtang nagpaingon sa Mactan Cebu International Airport aron makasakay sa alas 7:45 nga flight paingon sa Narita, Japan. Si Rosales maoy manager sa mga negosyo ni Kusaka dinhi sa Sugbu.

Giasoy ni PO2 Wenceslao nga sa dihang naabot sa eskina Ouano ug Plaridel ang giluwanang L300 van ni Kusaka, ang duha ka lalaki nga nagsakay og motorsiklo mitupad sa sakyanan. Ang angkas mikanaog sa motorsiklo ug dayong lili sa tainted nga bintana ug dayong pusil sa tuo nga bahin sa bintana sa backseat diin didto naglingkod si Kusaka.

Usa ka saksi miasoy sa kapolisan nga giatol sa mamumuno ang pagbanhig kang Kusaka sa dihang stop ang signal sa traffic light.

Si Kusaka nakaangkon og samad pinusilan sa iyang dughan, liog, ug tuo nga bahin sa iyang kilid ug maoy gituohang hinungdan sa iyang kamatayon.

Si Rosales, ang manager sa mga negosyo ni Kusaka, miasoy sa mga tigbalita nga si Kusaka paingon na nga mopauli sa Japan agi sa Narita.

Giimbestigar  karon si Rosales sa kapolisan ug posibleng pasakaan og kasong obstruction of justice tungod sa iyang pagdalidali og pahugas sa mga dugo sa L300 van nga giluwanan ni Kusaka atol sa pagpamanhig.

Tungod sa gibuhat ni Rosales nga gipahugasan ang L300 van human sa krimen, ang kapolisan naglisud sa pagsusi sa mga dugo nga nabanwasan na og tubig.

Si Mandaue City Police Office chief Rodel Calungsod mimando og subsob nga imbestigasyon. Wala nila isalikway ang anggulo sa negosyo ug gugma.

Si Bureau of Immigration and Deportation-7 Director Geronimo Rosas nagkanayon nga iyang susihon kun aduna bay Temporary Resident Visa si Kusaka tungod kay nakahimo kini sa pagminyo og Pilipina.

Gihulagway hinuon ni Konsehal Arsenio Pacaña nga isolated case lamang ang pagpamanhig ni Kusaka.

Si Mayor Jonas Cortes nagkanayon nga andam mohatag og ganti nga salapi ang kagamhanan sa dakbayan sa Mandaue alang niadtong makahatag og impormasyon nga makadulot sa daling kasulbaran sa pagpusil-patay ni Kusaka. – Uban sa report nilang Romeo Limpangog, Elly Bolonos ug Darrel Carumba