Paglabay'g granada i-"re-enact"

Mopahigayon  og ocular inspection ug reenactment ang hepe sa Provincial Investigation and Detective Management Branch (PIDMB) sa Cebu Provincial Police Office (CPPO) may labot sa paglabay og granada sa barangay hall sa barangay Inayagan siyudad sa Naga niadtong Oktubre 31 niining tuiga.

Kini ang nasayran sa mga tigbalita ni Supt. Teofilo Seclot nga karong Miyerkules moadto sila sa barangay hall sa Inayagan uban sa mga testigos aron mohimo og re-enactment sa maong hitabo.

Kagahapon sa buntag gipatawag usab sa pangulo sa CPPO, Sr. Supt Carmelo Valmoria ang hepe sa siyudad sa Naga Supt. Renato Malazarte aron hisgutan ang mao nilang lakang ni Seclot.

Kahinumduman niadtong Oktubre 31 sa kaadlawon nabungkag ang kilid nga bongbong sa barangay hall human kini labaya og granada sa wala mailhing tawo hinuon suwerteng walay gikatahong naangol.

Sayo niini, si kanhi Inayagan barangay kapitan ug karun napiling konsehal ning bag-o lang natapos nga barangay ug sk eleksyon Narciso Tablate nangangkon nga 100 porsiyento nga politika ang nagpaluyong motibo nga gilabay og granada ang barangay hall.