Mga establisamento sa Marina tak-opan

Laing lakang sa pagpatak-op sa Marina Mall ug sa uban pang patigayon nga gipanag-iya ni Efrain Pelaez Jr.  pagahimuon sa kagamhanan sa dakbayan sa Lapulapu.

Ang maong lakang nga pagahimuon sa kagamhanan bisan pa sa natigayon nga sabot-sabot nila ni Mayor Arturo Radaza uban sa mga nag-abang nga negosyante.

Sa gipadayag sa habig ni  Radaza maoy ilang gipasabot nga ilang katungod ang pagpatuman sa balaod sa kagamhanan sa dakbayan batok niadtong mga nakahimo og kalapasan.

Dugang pa nila nga ilegal ang  pagtukod sa Marina Mall nga gipanag-iya ni Pelaez sanglit wala kini permit gikan sa kagamhanan sa dakbayan sa Lapulapu.

Mitambong sa maong panagtagbo uban ni Mayor Radaza mao sila si Atty Vincent Lim, City Administrator Teodulo Ybanez, Atty Richard Sison ug uban pa.

Sa nasayran nga kapin sa 100 nga mga nag-abang sa Marina Mall ang mitambong sa maong panagtagbo nga mipadayag usab sa paghimo og lakang alang sa pagdepensa sa ilang patigayon.

Kahinumdoman nga gihimo sa kagamhanan sa dakbayan  ang pagtak-op sa Marina Mall niadtong miaging bulan apan nabuksan kini og balik dihang nanginlabot ang Philippine Export Zone Authority.