Polis nga namusil hayan imbestigahon

Hayan mag-atubang og kasong administratiba ang usa ka polis nga nadestino sa Tabuelan Police station nga giakusahang namusil sa managsuong nangaparot sa pagka kapitan sa milabay'ng eleksyon.

Kini human nagdumili pagpaubos sa paraffin test aron unta pagtino kung nakapabuto ba gyud ang maong polis sa armas.

Si SPO1 Victor Agang giakusahang namusil niadtong Lunes sa gabii sa managsuong Raymund Gallo residente sa sitio Batawng barangay Tabunok  ug Zito Gallo residente sa barangay Olivo Tabuelan kinsa parehong nangaparot pagka kapitan niadtong  Oktubre 29 sa ilang tagsatagsa ka barangay.

Apan ang duha ka habig parehong dunay managlahing version ngadto sa kapolisan sa Tabuelan sa maong insidente.

Ang managsuong Gallo miingon nga kalit lang namusil kanila si SPO1 Agang diha sa panimalay ni Raymund samtang ang polis nagsakay sa iyang motorsiklo niadtong Lunes sa gabii.

Apan sa iyang bahin si SPO1 Agang  mihimakak sa maong pasangil ug matud niya nagsakay siya sa iyang motorsiklo niadtong tungora paingon sa balay sa iyang ig-agaw aron magkuha sa bugas nga rasyon apan pagkatungod niya sa panimalay ni Raymund kalit siya nakadungog og buto-buto sa armas.

Daling  mipasirit si Agang sa iyang motorsiklo sa pagtuong siya maoy target sa maong pagpamusil.

Apan si CPPO Director Sr. Supt Carmelo Valmoria nga nakadawat sa tawag sa hepe ni Tabuelan Insp. Camelo Gonzaga nga nagpahibalong paingon si Agang didto sa San Remegio ug Bogo mimandu dayon si Valmoria nga mohimo blocking force aron madakpan si Agang.

Si Valmoria  mipadala dayon kang Supt Teofilo Seclot hepe sa Provincial Investigation and Detective Management Branch didto sa Tabuelan aron mo-conduct og imbestigasyon aron mahibaw-an ang tinuuray nga hitabo.

Apan si Seclot  napakyas sa pagkuha og affidavit sa mga Gallo kini human ang abogado sa naulahi  mitambag nga dili mo-isyu og affidavit   og ang abogado nalang ang mohimo ug mohatag ug kopya ni Seclot.

Gibutyag ni Seclot gawas sa managsuong Gallo duna pay laing unom ka saksi nga si Agang  mipabuto gyud sa iyang armas ug andam kining mo-execute og affidavit ang unom ka saksi.

Dugang pang Seclot nga si Agang negatibo sa resulta sa liquor test apan nagdumili hinuon sa pagpaubos sa paraffin test.

Sa dihang gipangutana nganong dili magpa paraffin test si Agang wala na mohatag pa og rason ngadto kang Seclot.

Tungod niini si Agang mag-atubang og kasong Administratiba base sa kamanduan ni Valmoria.

Matud ni Seclot ang pagdumili ni Agang sa paraffin test maoy nakapasamot sa pagduda sa maong pasangil ug posibleng maoy basehanan nga tinuod ang pasangil sa managsuong Gallo.

Hinuon matud pang Seclot wala pa niya masugdi ang pormal nga imbestigasyon ug giangkon niini nga nakadawat siya og report nga si Agang dunay gikalalis nga ginganlan og Ozuot nga giiingong supporter ni Raymund Gallo sa milabay'ng eleksyon.

Sa pagka karun si Agang kasamtangan unang gidistino sa Cebu Provincial Service group samtang nagpadayon ang imbestigasyon batok kaniya.