Kap. Bercede planong mag-ABC President

Gikumpirmar  ni kanhi Konsehal ug  Banilad Barangay Kapitan  Glenn Bercede ang dako niyang tinguha nga mangulo sa Association of Barangay Council (ABC) sa dakbayan sa Mandaue.

Si Bercede nga gikahinabi sa Banat News miingon nga andam siya alang sa pagsakbang kang Incumbent ABC Federation President Joveta Tuela Joy Ouano kun magpasubli kini sa maong katungdanan.

Matud pa niya nga sa 27 ka barangay kapitan nga midaug sa miaging barangay election ang 24 niini maoy mipadayag og suporta sa iyang kandidatura.

Gitataw ni Bercede nga gitinguha niya ang pagpangulo sa ABC sa dakbayan sanglit daghan siyag pagahimoong kausaban nga iyang gitumong alang sa dinaliang pagtagad sa panginahanglan sa ubang kabarangayan.

Naglakip sa gitinguha niyang kausaban mao ang pagpahigayon og binulan nga panagtigom ug ang paghatag og dinaliang kasulbaran sa panginahanglan sa ubang barangay nga napasagdan niining panahona.

Si Bercede kinsa kanhi kapitan sa Banilad ang nahimo na nga konsehal sa dakbayan sulod na sa siyam ka tuig kinsa nagpili nga bise mayor sa May 14 election isip Tandem ni Jonas Cortes sa Team Honesty apan naparot sanglit si Bise Mayor Carlo Fortuna man ang midaug.

Gikonsidirar usab ni Bercede  nga mitumaw nga mga pangalan nila ni Labogon Barangay Kapitan Damaso Masoy Tumulak, Ibabao Estancia nga si Kapitan Jun   Delmar ug Looc Barangay Kapitan Cesar Sol Cabahug.

Hinuon si Kapitan Tumulak nga gikahinabi sa Banat News miingon nga wala niya ihiklin ang tinguha alang sa paghupot sa maong katungdanan isip ABC federation president.

Gipasabot niya nga ang mao niyang tinguha iyang gi-agad sa kahigayonan sanglit ang pagdaug sa maong piniliay mag-agad man sa gidaghanon ug sa kahiusahan alang sa pagsiguro sa kadaugan.

Si Tumulak mitataw nga ang umaabot nga ABC election wala niya hatagi og gibug-aton sanglit gitingob man niya ang dakong  tinguha sa pagpalambo sa Labogon isip bugti sa pagsubli kaniya sa ikaduhang higayon.