Nangkaan ni Gwen gipangguba

Gipanamastamasan sa mga walay lingaw ang gipananum nga nangka sa kalungsoran ubos sa Greening With our Environment Now (GWEN) program sa kagamhanan sa lalawigan sa Sugbu.

Usa sa mga lungsod nga nipatuman sa programa nga mao ang Daanbantayan gikataho nga gipangguba sa mga badlungon ang gikoral nga kahoy sa matag punoan sa nangka.

Labihan kasagmuyo sa mga tinun-an ug mga magtutudlo sa pangpublikong tunghaan sa maong lungsod gumikan sa resulta sa ilang paghago.

Nunot niini giawhag sa mga opisyal sa lungsod, pinangulohan ni Mayor Sun Shimura, ang mga opisyal sa kabarangayan ug mga tanod nga motabang sa pagbantay sa mga gipangtanum nga nangka daplin sa kadalanan.

Gidasig usab sa mga opisyal ang katawhan nga natungdan sa gipangtanum nga nangka nga mobantay sama sa ilang kaugalingong tanum aron molambo kini sa umaabot nga mga adlaw ug mapuslan ang kahago sa nananum niini ug ang programa ni Gob. Gwendolyn Garcia.

Gilusad sa kagamhanan sa lalawigan sa Sugbu ang GWEN Program tumong sa pagpanindot sa kadalanan nga dunay mga tanum nga kahoy sa daplin niini diha sa kalungsoran.

Ubos sa programa, gidasig usab ang katawhan nga mananum og kahoy nga mamunga og prutas samtang ang kagamhanan ang mohatag sa turok nga itanum.

Ang lakang nga gihimo sa lokal nga kagamhanan sa lungsod sa Daanbantayan isip tubag sa problema nga masalbar pa ang nahabilin nga mga tanum gikan sa pagpanamastamas sa mga badlungon sa katilingban.