Display sa pabuto sa sidewalk gidili – Codilla

Hugtanon karong gidili ang pagpamaligya ingon man pag-display og mga klase klaseng pabuto alang karong Pasko ug Bag-ong Tuig sa mga sidewalk ug kadalanan dinhi sa dakbayan sa Sugbu.

Kini human pulos gipamalibaran ug wala aprobahi ni Cebu City Fire Marshal Supt. Esmael Codilla ang tanang mga application aron pagkuha og permiso nga makabaligya og mga firecrackers karong Pasko dinhi sa dakbayan.

Nasayran nga gikinahanglan nga mangayo og permiso gikan sa Fire Department kadtong mga manindahay nga mo-display ug mobaligya og mga pabuto dinhi sa dakbayan.

Apan giklaro ni Codilla nga sukad sa iyang pag-asumer isip fire marshal sa dakbayan sulod sa lima ka tuig na ang milabay wala gyud siya mohatag og permiso sa mga manindahay og pabuto sa Pasko nga maka-display dinhi sa dakbayan.

Iyang giklaro dihang nahinabi sa Banat News nga kun duna may mamaligyaay og pabuto sa mga sidewalk dinhi sa dakbayan ilabi na karong Pasko ilegal kini ug walay pagtugot sa ilang buhatan.

Gitug-an ni Codilla nga karon lang bulana duna nay sobra sa napulo ka indibidwal ang buot unta molukat og permiso sa ilang buhatan apan pulos niya kini gibalibaran human iyang makita nga makahatag lang kini og peligro sama sa sunog.

Gawas niini, gipasabot usab niya nga dunay ordinansa nga gi-aprobahan sa konseho nga nagdili pagpataka og pamaligya ingon man pag-display og mga pabuto sa Pasko dinhi sa kadalanan sa dakbayan.

Giluwatan kining maong pahimangno sa fire marshal human ma-obserbahi niini ilabi na niadtong nanglabay nga Pasko nga duna gyuy mga maninda og klase klase nga pabuto diha sa mga sidewalk dinhi sa dakbayan ilabi na gyud kun magsingabot na ang Pasko ug pagsugat sa Bag-ong Tuig.