Bisan wala sa lagda sa balaod, ang mga tsirman sa Sangguniang Kabataan sa 20 ka barangay sa lungsod sa Daanbantayan ipaubos sa eksaminasyon ug interbyu sa dili pa sila magpili og pangulo nga molingkod isip sakop sa Sangguniang Bayan.
Ang tinugyanan sa Department of Interior and Local Government sa lungsod sa Daanbantayan pinangulohan ni Carlo Fernando Logarta ang moumol og grupo nga mopahigayon sa interbyu ug eksaminasyon.
Giangkon ni Bise-Mayor Maria Luisa Loot nga siya ang nagsugyot niini ngadto sa DILG aron ang mapili nga presidente sa SK Federation mao kadtong makamao gyud sa iyang trabaho.
Dili na buot si Loot nga masubli pa ang ilang kasinatian sa niaging eleksiyon nga ang anak sa iyang bise-mayor nga si Jose de Leon Jr. ang gipaluyohan og partido apan hangtod karon walay nahimo sa katungdanan isip sakop sa konseho sa lungsod.
Hinuon sa bag-ong napili nga mga opisyal sa SK, walay mga anak sa mga politiko sa lungsod sa Daanbantayan nga napili nga posibleng maoy paluyohan usab sa mga politiko alang sa pederasyon.
Matud pa ni Loot nga pinaagi sa eksaminasyon ug interbyu, anha masukod ang katakus sa usa ka SK tsirman kun unsay mapaabot sa kabatan-onan kun kini makalingkod na sa katungdanan.