BET sa Talisay makadawat na

Mga Board of Election Tellers sa dakbayan sa Talisay  makadawat na sa ilang honorarium karong adlawa matud pa  ni Talisay City Comelec Officer Corazon Moran.

Si Moran sa pakighinabi niini sa Banat News kagahapon nagkanayon nga naa na sa tresurera sa siyudad ang mga honorarium ug pirmahan na lang niya ang mga payroll aron karong adlawa makuha na sa mga magtutudlo ang ilang honorarium.

Ang tseke sa maong salapi naabot sa milabay pang semana apan wala kini mahatag dayon tungod kay naghuwat pa sa payroll  gikan sa Department of Education.

Gibase sa attendance ang ilang pagpanghatag sa honorarium ug ang DepEd maoy naghupot sa attendance.

Apan P1,000 lang gyud ang madawat sa mga magtutudlo ug ang giingong dugang nga P500  isunod lang.

Gibutyag ni Moran nga base sa ilang guidelines, ang mga BET makadawat unta og P2,000 sa duha ka adlaw niining serbisyo, laing P500 alang sa transportation allowance ug P500 usab nga dugang ngadto sa mga naghupot usab og presinto sa Sangguniang Kabataan gawas sa barangay.

Si Moran midungag nga nakugang siya sa iyang pagkahibalo nga gikaltasan ang mga honorarium hinungdan nga miadto sila sa buhatan sa Comelec sa probinsiya aron pagkompirmar sa maong taho diin gihatagan sila og communication gikan sa ilang finance officer sa Comelec, Manila nga ang nahisgutang budget mao ray gihatag sa Department of Budget and Management.